Sońǵy 7 jylda alǵash ret medýnıversıtet oqytýshylary attestattaýdan ótedi
ASTANA. KAZINFORM – QR Densaýlyq saqtaý mınıstrligi stýdentter men rezıdentter arasynda aralyq táýelsiz emtıhan, sondaı-aq barlyq medıtsınalyq joǵary oqý oryndarynyń professor-oqytýshylar quramyn attestattaýdan ótkizetinin habarlady.
Búgin Astanada vedomstvo alqasynyń otyrysy barysynda kadrlardy daıarlaý sapasyn jaqsartý jáne oqytýshylardyń quzyrettilik deńgeıin arttyrý úshin aǵymdaǵy jaǵdaıdy taldaý júrgizý qajet ekendigi atap ótildi.
Táýelsiz baǵalaý nátıjeleri medıtsınalyq joǵary oqý oryndarynda bilim berý protsesin jaqsartýǵa baǵyttalǵan odan arǵy strategııalar men baǵdarlamalardyń ázirlemesi úshin, sondaı-aq medıtsınalyq bilim berý men ǵylymı qyzmetti damytýdyń basym baǵyttaryn aıqyndaý úshin paıdalanylatyn bolady.
«Stýdentter men rezıdentterdiń bilimin táýelsiz baǵalaý, sondaı-aq professor-oqytýshylar quramyn attestattaý eń aldymen medıtsınalyq bilim berý sapasyn arttyrýǵa jáne otandyq densaýlyq saqtaý júıesi úshin kadrlar daıarlaýdyń joǵary deńgeıin qamtamasyz etýge baǵyttalǵan», - delingen mınıstrliktiń resmı málimdemesinde.
Oqytýshylardyń táýelsiz attestatsııasy sońǵy ret 2017 jyly ótkizilgenin atap ótken jón.
