Sońǵy 6 jylda memlekettik qaryz kólemi qalaı ózgerdi
ASTANA. KAZINFORM — Sońǵy 6 jylda memlekettik qaryz kólemi 2 esege artyp, 36 trln teńgege jetti. Bul týraly Quryltaıdyń Qarjy jáne bıýdjet komıtetiniń 2027–2029 jyldarǵa arnalǵan respýblıkalyq bıýdjet týraly zań jobasy tanystyrylymyna arnalǵan otyrysynda Ulttyq ekonomıka vıtse-mınıstri Azamat Ámrın aıtty.
Onyń aıtýynsha, 2020 jyldan beri Qazaqstannyń úkimettik qaryzy 16 trln teńgeden 34 trln teńgege deıin ósken, ıaǵnı qaryz kólemi 2,1 esege artqan. Al osy kezeńde eldiń jalpy ishki ónimi 70 trln teńgeden 150,9 trln teńgege deıin, ıaǵnı 2,3 esege ósken.
— Eger qaryzdyń JІÓ-ge qatynasyn alatyn bolsaq, bul kórsetkish 23,6-dan 21,8 paıyzǵa tómendedi. Demek, 1,8 paıyzdyq tarmaqqa azaıdy. Memlekettik qaryz absolıýttik mánde ósip jatqanymen, ekonomıkanyń ósý qarqyny qaryzdyń ósýinen joǵary bolyp otyr. Sondyqtan jalpy ekonomıkaǵa túsetin boryshtyq júkteme tómendep keledi, — dep túsindirdi Azamat Ámrın.
Vıtse-mınıstr memlekettik qaryzdyń shamamen 75%-y ishki qaryzǵa, al 25%-y syrtqy qaryzǵa tıesili ekenin atap ótti. Іshki memlekettik baǵaly qaǵazdar boıynsha tólenetin paıyzdar Qazaqstandaǵy bankterge, zeınetaqy júıesine jáne basqa da ishki ınvestorlarǵa beriledi.
— Demek, bul qarajat ekonomıkadan syrtqa shyqpaıdy, kerisinshe onyń ishinde qaıta bólinedi, — dedi ol.
Azamat Ámrınniń atap ótýinshe, Úkimet boryshtyq júktemeni azaıtý úshin eń aldymen bıýdjet tapshylyǵyn qysqartýdy kózdep otyr. Bul jańa qaryz alýǵa degen qajettilikti azaıtýǵa múmkindik beredi. Bıýdjet tapshylyǵyn 2025 jyly JІÓ-niń 2,7 paıyzynan 2026 jyly — 2,5, al 2027 jyly 2,3 paıyzǵa deıin tómendetý josparlanyp otyr.
Qaryz júktemesin basqarýdyń taǵy bir tásili — qaryzdy qaıta qarjylandyrý jáne tólem merzimderin birkelki bólý. Memlekettik qaryzdyń 4 paıyzy — qysqa merzimdi, 45 paıyzy — orta merzimdi jáne 50 paıyzy — uzaq merzimdi qaryzdar.
— Sondyqtan qaryzdyń negizgi bóligi orta jáne uzaq merzimge tıesili. Bul qaıta qarjylandyrý táýekelderin, onyń ishinde qysqa merzimdegi táýekelderdi azaıtýǵa múmkindik beredi, — dep atap ótti vıtse-mınıstr.
Buǵan deıin memlekettik organdar 2027 jylǵa suraǵan qarjynyń 5 trln teńgesi negizsiz bolǵanyn jazǵan edik.
