Sońǵy 5 jylda Qazaqstandaǵy týrıster sany 7,5 ese ósti – Úkimet
ASTANA. KAZINFORM – QR Premer-mınıstri Oljas Bektenov eldegi týrızm salasyn damytý jáne tsıfrlandyrý týraly Úkimet otyrysyn ótkizdi.
− Qazaqstan – tarıhy tereń, tabıǵaty ásem, mádenıet pen salt-dástúrge baı memleket. Ulan-ǵaıyr dalamyzdyń ár qıyrynda týrısterdi qyzyqtyratyn kórikti jerler kóp. Sondyqtan týrızm el ekonomıkasynyń ósýine jańasha serpin beretin salaǵa aınalýy qajet. Bul rette, Qazaqstandaǵy týrızmniń damý áleýeti – óte joǵary. Sońǵy 5 jylda týrısterdiń sany 7,5 esege ósti. Byltyr elimizge 15 mln-nan astam adam saıahattap keldi, − dedi O.Bektenov Úkimettiń búgingi otyrysynda.
Premerdiń aıtýynsha, Prezıdent tapsyrmasymen osy salada iri ınvestıtsııalyq jobalar qolǵa alyndy. Almaty qalasy men Almaty oblysynda taý klasterin damytý jumystary belsendi júrip jatyr. Shyǵys Qazaqstan – taý shańǵysy men tabıǵı týrızmdi damytýǵa qolaıly óńir.
Şýche-Býrabaı kýrorttyq aımaǵynda jyl boıy jumys isteıtin týrıstik obektiler qurýǵa jáne ekologııalyq, sporttyq týrızmdi damytýǵa múmkindik beretin aýqymdy jańǵyrtý jumystaryn júrgizý josparlanǵan.
Aqtaý mańyndaǵy «Jyly jaǵajaıda» bes juldyzdy qonaq úı men oıyn-saýyq parkin salý jobalary júrgizildi. Osy óńirdegi Kendirli kýrorttyq aımaǵynda áýejaı salynady.
− Búginde is-sharalyq jáne mádenı týrızm belsendi damyp keledi. Elimizde kóptegen mádenı jáne sporttyq is-sharalar, bıznes-forýmdar ótip jatyr. Barlyq múddeli memlekettik organ osyndaı aýqymdy is-sharalardy týrısterdi tartýǵa beıimdeý úshin naqty tetikterdi ázirleýi kerek. Ótken jyly «Your tourist pass» jobasy bastaldy. Bul qural QR-kodty skanerleý arqyly ulttyq týrıstik portaldy, e-Qonaq kóshi-qon servısin, taksı qyzmetin jáne basqa da paıdaly resýrstardy qoljetimdi etedi. Buǵan qosa, álemniń kóptegen elinde keńinen tanymal «Tax Free» pılottyq jobasy da jaqsy nátıje kórsetip otyr, − dedi Oljas Bektenov.
Aıta keteıik, ótken jyly Uly Jibek jolynyń boıymen ótetin «Jibek joly» týrıstik poıyzy iske qosyldy jáne 125 temirjol vokzalyn aýqymdy jańǵyrtý jumystary bastaldy. Almaty, Shymkent jáne Qyzylorda áýejaılarynyń jańa termınaldary salyndy.
− Kóshi-qon rásimderin ońaılatý sharalary qolǵa alyndy. Máselen, shekara beketterinde uıymdasqan týrıstik toptardy kezeksiz ótkizý boıynsha pılottyq joba iske qosyldy. Bul shara pasporttyq baqylaýdan ótý ýaqytyn 5 ese qysqartýǵa múmkindik berdi, − dedi Úkimet basshysy.
Buǵan deıin Aqmola oblysynyń ákimi Marat Ahmetjanov Býrabaı kýrorttyq aımaǵyn damytý úshin 2025-2029 jyldarǵa arnalǵan keshendi jospar týraly aıtyp bergen edi.
«Astana Kontsert» kompanııasynyń prodıýseri Málik Hasenov amerıkalyq aktrısa jáne ánshi Djennıfer Lopestiń Astanada ótetin kontsertinen qansha ekonomıkalyq paıda túsetinin aıtty.