Sońǵy 5 jylda elimizden 2,5 myń dáriger shetelge jumys isteýge ketti — DSM

ASTANA. KAZINFORM — Sońǵy 5 jylda elimizden 2,5 myń dáriger shetelge jumys isteýge ketip qaldy. Bul týraly Densaýlyq saqtaý birinshi vıtse-mınıstri Tımýr Sultanǵazıev aıtty.

— Medıtsına salasy mamandaryn soqqyǵa jyǵý saldarynan jumystan shyǵýyna baılanysty statıstıkalyq derek joq. Jalpy, medıtsına kadrlarynyń tapshylyǵyna qatysty statıstıka bar. Búginde shamamen 4 myńǵa jýyq dáriger men shamamen 5 myń orta býyn medıtsına mamany jetispeıdi. Sonymen qatar jalpy medıtsına júıesinen mamandardyń shetelge ketip jatqany bar ekenin atap ótkim keledi. Tek sońǵy 5 jyldyń ishinde ǵana shamamen 2 500 dáriger Qazaqstannan basqa elge jumys isteý úshin ketip qaldy, — dedi vıtse-mınıstr Májilistiń jalpy otyrysynda depýtattardyń saýalyna oraı.

Aıta keteıik, Májilis otyrysynda dárigerler men jedel járdem qyzmetkerlerin qorǵaýǵa arnalǵan zań jobasy talqylanyp jatyr.

Taldaý barysynda Tımýr Sultanǵazıev elimizdegi barlyq jedel járdem qyzmetkerleri beınetirkegishpen qamtamasyz etiletinin aıtty.