Sońǵy 3 jylda Qazaqstannyń poıyzdarynda qansha sábı dúnıege keldi
ASTANA. KAZINFORM – «Jolaýshylar tasymaly» AQ sońǵy úsh jyl ishinde poıyzdarda dúnıege kelgen sábıler týraly málimet jarııalady.
«2021 jyldan 2024 jylǵa deıin poıyz ishinde 11 sábı dúnıege keldi. Ondaı sátte jolserikter, jyljymaly quram qyzmetkerleri, poıyz bastyqtary bosanýǵa tikeleı qatysady»,- dep jaýap berdi kompanııanyń baspasóz qyzmeti.
Aqparatta aıtylǵandaı, poıyz brıgadasynyń qyzmetkerleri qajet bolǵan jaǵdaıda alǵashqy kómek kórsetedi jáne olar arnaıy kýrstan ótken.
Aıta keteıik, bıyl 9 qańtarda aqtóbelik kelinshektiń «Almaty-Aqtóbe» baǵytyndaǵy poıyzda bosanǵany týraly habarlaǵan edik.
«Men balam úshin qatty qoryqtym. Alaıda poıyz qyzmetkerleri maǵan osyndaı jaǵdaıda kómek kórsetip, janymnan ketpeı, aman-esen bosanýyma septigin tıgizdi. Bul kún bizdiń otbasymyz úshin esten ketpes sátterdiń birine aınaldy. Endi qyzym eseıgen kezde bul erekshe oqıǵany aıtatyn bolamyz», - dedi jas ana Aınagúl Tileýbergenova.
Ata-anasy dúnıe esigin ashqan náresteniń esimin Malıka dep qoıǵan.
