Sońǵy 20 jylda jol apatynan adam shyǵyny eki ese tómendedi — Aqtoty Boranova
ASTANA. KAZINFORM — Qazaqstanda jol-kólik oqıǵalarynan bolatyn adam shyǵynyn azaıtýǵa múmkindik bar jáne bul baǵyttaǵy jumystar júıeli túrde jalǵasyp keledi. Bul týraly QR ІІM Ákimshilik polıtsııa komıtetiniń resmı ókili Aqtoty Boranova BIZDIÑ ORTA podkastynda aıtty.
Aqtoty Boranovanyń aıtýynsha, sońǵy 20 jylda eldegi halyq sany men kólik sany aıtarlyqtaı artqanyna qaramastan, jol-kólik oqıǵalarynan bolatyn adam ólimi eki esege tómendegen.
— Osydan 20 jyl buryn Qazaqstan halqynyń sany shamamen 16 mıllıon bolsa, qazir 20 mıllıonnan asty. Sol kezde elimizde 2,5 mıllıon kólik tirkelgen edi, búginde olardyń sany 5,5 mıllıonǵa jýyqtady. Buǵan qosa, 500 myńǵa jýyq tranzıttik kólik bar. Sol kezderde adam shyǵyny jylyna 4,5 myń bolatyn. Atqarylǵan jumystardyń nátıjesinde qazir eki esege tómendedi. Árıne, qazirgi tańda da jylyna 2 myńnan astam adam jol-kólik oqıǵalarynan kóz jumady. Degenmen adam ólimin azaıtý baǵytyndaǵy jumystardyń nátıjesi jyldan jylǵa baıqalyp keledi, — dedi Aqtoty Boranova.
Onyń aıtýynsha, 2025 jyldyń qorytyndysy boıynsha jol qaýipsizdigin qamtamasyz etý sharalarynyń arqasynda 270 adamnyń ómirin saqtap qalýǵa múmkindik týǵan.
— Jalpy statıstıkaǵa súıensek, tómendeý úrdisi baıqalady. Alaıda qoǵam nazaryn aýdaratyn jantúrshigerlik jol apattary atqarylyp jatqan jumystardyń nátıjesin kóleńkede qaldyryp jatady, — dedi ol.
Vedomstvo ókiliniń aıtýynsha, jol qozǵalysy qaýipsizdigin arttyrýda negizgi máselelerdiń biri — qarjylandyrý.
— Іshki ister mınıstrligi júrgizilgen taldaý men zertteýlerdiń nátıjesinde qajetti usynystardy engizedi. Keıin olar josparlarǵa engizilip, qarjylandyrý máselesine qaraı kezeń-kezeńimen iske asyrylady. Adam ómirin saqtap qalýǵa baǵyttalǵan kez kelgen qural tıimdi dep esepteımiz, — dedi spıker.
Sondaı-aq Aqtoty Boranova balalardyń qaýipsizdigine erekshe nazar aýdarylatynyn aıtty.
— Bizdiń mınıstrdiń basty talaptarynyń biri — profılaktıka, ıaǵnı oqıǵa bolǵannan keıin onyń saldarymen kúresý emes, qaýiptiń aldyn alý. Sondyqtan balalar arasynda túsindirý jáne aldyn alý jumystary qarqyndy júrgizilip keledi, — dep túıindedi ol.
Aıta keteıik, respýblıka joldaryndaǵy jol apattarynan bolatyn ólim-jitim 26,8 paıyzǵa tómendegenin jazǵanbyz.
