Sońǵy 10 jylda elimizdegi aýyl sany 582-ge qysqardy
ASTANA. KAZINFORM – Sońǵy 10 jylda elimizde aýyldar sany 582 birlikke qysqardy. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Búgingi tańda respýblıkamyzda 6 256 aýyldyq eldi mekende 7,6 mln adam turady. Jalpy elimizdegi halyq sanynyń 38,4 paıyzyn quraıdy. Bul rette tabysy eń tómengi kúnkóris deńgeıinen tómen aýyl halqynyń úlesi - 7,2, al jumyssyzdyq deńgeıi - 4,7. Ózin-ózi jumyspen qamtyǵandar úlesi – 33 paıyz nemese 1,2 mln adam. «Qazaqstan Respýblıkasynyń ákimshilik-aýmaqtyq qurylysy týraly» Zańnyń talaptaryna sáıkes júrgizilgen jumystar nátıjesinde sońǵy 10 jylda aýyldyq eldi mekender sany 6 838-den 6 256 deıin, ıaǵnı 582 birlikke qysqardy. Negizinen, aýyl sanynyń qysqarýy, turǵyn sany 50 adamnan kem aýyldar jaqyn mańdaǵy eldi mekenniń quramyna engizilýinen bolady», - dedi mınıstr.
Onyń atap ótýinshe, mınıstrlik jyl saıyn Óńirlik standarttar talaptaryna sáıkes aýyldardyń qamtamasyz etilýine monıtorıng jáne taldaý júrgizedi. Máselen, 2023 jyly qamtamasyz etý deńgeıi 64,3 paıyzdy qurady. Ol 2022 jylmen salystyrǵanda 2,1 tarmaqqa joǵary. Bul rette, obektilermen jáne qyzmettermen qamtamasyz etilýdiń eń joǵary deńgeıi Mańǵystaý – 72,4, Atyraý – 70 jáne Aqtóbe oblystarynda 69,6 paıyz deńgeıinde baıqalady. Qamtamasyz etilý deńgeıi tómen kelesi oblystar: ShQO – 58, Ulytaý – 57 jáne Abaı – 55,4 paıyz.
«Sonymen qatar Óńirlik standarttar kórsetkishterin taldaý nátıjelerine sáıkes, qamtamasyz etýdiń joǵary jáne ortasha deńgeıi bar aýyldar sanynyń artýy baıqalady. Osylaısha, qamtamasyz etilý deńgeıi joǵary aýyldar sany 1 296 birlikti quraıdy. Bul 2022 jylmen salystyrǵanda 169 birlikke artty. Sonymen qatar, kórsetkishteri tómen aýyldardyń úlesi 1 676-dan 1 399 aýylǵa deıin azaıdy», - dedi Nurlan Baıbazarov.
