Sońǵy 10 jylda balalar úılerindegi bala sany eki esege qysqardy — Oqý-aǵartý mınıstrligi

ASTANA. KAZINFORM — Qazaqstanda jetim jáne ata-anasynyń qamqorlyǵynsyz qalǵan balalardy otbasy úlgisinde tárbıeleý tájirıbesi keńeıip keledi. Sonyń nátıjesinde sońǵy 10 jyl ishinde balalar úılerinde tárbıelenetin bala sany eki esege azaıǵan. Bul týraly Oqý-aǵartý vıtse-mınıstri Edil Ospan Ortalyq kommýnıkatsııalar qyzmeti alańynda ótken dóńgelek ústelde málimdedi.

— Júrgizilgen sharalardyń nátıjesinde balalar úılerinde tárbıelenetin balalar sany sońǵy 10 jylda eki esege qysqardy. Qazaqstan azamattary jyl saıyn 1000-nan astam jetim balany óz otbasyna qabyldaıdy, — dedi vıtse-mınıstr.

Onyń aıtýynsha, balalar ınternat mekemelerin ınstıtýtsıonalsyzdandyrý saıasaty jalǵasyp jatyr. Bul baǵytta balalar úılerine balama retinde kásibı otbasy ınstıtýty engizilgen.

— Kásibı otbasy modeli jetim balalardy januıalyq ortada tárbıeleýge baǵyttalǵan. Byltyr bul júıe alǵash ret engizilip, tıimdi nátıjeler kórsetti, — dedi Edil Ospan.

Sonymen qatar elimizdiń barlyq óńirinde balalar úıi túlekterin áleýmettik qoldaýǵa arnalǵan «Meıirim» qaıyrymdylyq aktsııasy júzege asyrylyp jatyr. Atalǵan joba aıasynda balalarǵa moraldyq jáne materıaldyq qoldaý kórsetiledi.

— Jetim balalardy turǵyn úımen qamtamasyz etý boıynsha da jańa tetikter engizilip jatyr. Bul — olardyń qoǵamǵa beıimdelýi men tolyqqandy ómir súrýine baǵyttalǵan mańyzdy qadam, — dep tolyqtyrdy vıtse-mınıstr.

Qazirgi tańda Oqý-aǵartý mınıstrligi jetim balalardy qoldaýdyń zamanaýı ári tıimdi úlgilerin engizý arqyly ınternat mekemelerin qysqartý, balalardy otbasyna ornalastyrý jáne qoǵamdyq qoldaýdy arttyrý baǵytynda júıeli jumystar júrgizip keledi.