Sońǵy 10 jylda 2 ǵana otandyq preparat tirkelgen – Álıhan Smaıylov
ASTANA. KAZINFORM – QR Joǵary aýdıtorlyq palatasynyń tóraǵasy Álıhan Smaıylov Májilistiń jalpy otyrysynda farmatsevtıka salasynda ǵylymı zertteýlerdiń nátıjeliligi tómen ekenin aıtty.
- Bıomedıtsınalyq jáne klınıkalyq zertteýlerdiń retteýshilik bazasynda da kemshilikter bar. Birneshe jyl ótse de bıomedıtsınalyq zertteýlerdi tirkeý júıesi men klınıkalyq bazalar tizilimi áli jasalmaǵan. Osynyń saldarynan ǵylymı zertteýlerdiń nátıjeliligi óte tómen. Sońǵy 10 jylda elimizde nebári eki túpnusqa otandyq preparat tirkelgen. Olardyń bireýin ázirleýge 4 mlrd teńgeden astam qarajat jumsalǵanyna qaramastan, Ulttyq dárilik formýlıarǵa engizilmegen, - dedi Joǵary aýdıtorlyq palatasynyń tóraǵasy.
Sondaı-aq ol bul salaǵa memlekettik qoldaý sońǵy jyldary aıtarlyqtaı óskenin atap ótti.
- Memleket otandyq farmatsevtıkany damytý úshin aýqymdy kólemde jeńildikter men preferentsııalar berýde. 2022-2024 jyldary osy salaǵa berilgen preferentsııalardyń jalpy kólemi 148 mlrd teńgege jetti. Sonymen qatar Biryńǵaı dıstrıbıýtor otandyq taýar óndirýshilerdiń ónimin 10 jyl boıy satyp alýǵa kepildik beretin uzaq merzimdi sharttar jasaıdy. Mundaı satyp alý kólemi sońǵy bes jylda 69 mlrd teńgeden 112 mlrd teńgege deıin ósti, - dedi Álıhan Smaıylov.
Odan bólek, spıker elimizde óndiriletin dári-dármekter sany eki ese azaıyp ketkenin aıtty.
«Otandyq taýar óndirýshilerden satyp alýdyń jalpy kóleminiń ósýine qaramastan, otandyq kompanııalar jetkizetin dári-dármekter assortımenti 968-den 507-ge deıin, ıaǵnı 2 esege jýyq azaıǵan. Basqasha aıtqanda, otandyq taýar óndirýshiler óndirisi jeńil medıtsınalyq buıymdar shyǵarýdy ulǵaıtqanymen, elimizde óndiriletin dári-dármekter sany qysqarýda», – dedi ol.
Osyǵan deıin Qazaqstandaǵy farmnaryqtyń 84 paıyzy sheteldik ónim ekeni týraly jazdyq.