Sońǵy 10 jyl ishinde 230 tonnadan astam kannabıs tobynyń esirtkileri joıyldy

ASTANA. KAZINFORM – Іshki ister mınıstrligi jaz ben kúz mezgilderinde jyl saıyn “Qarasora” jedel-profılaktıkalyq is-sharasyn ótkizedi. Ol esirtki quraldarynyń zańsyz aınalymyna qarsy turýǵa baǵyttalǵan, dep habarlaıdy Polisia.kz.

Qolaıly klımattyq jaǵdaılarǵa baılanysty eldiń ońtústik óńirleri jabaıy qarasora ósetin tabıǵı oshaqtar bolyp tabylady. 2014 jyldan bastap Qyzylorda oblysynda quramynda «tetragıdrokannabınol» dep atalatyn esirtki bar úndi jáne gollandııalyq qarasora belsendi túrde ósiriledi.

Sońǵy 10 jyl ishinde «Qarasora» operatsııasy kezinde ІІM tikushaq tehnıkasyn qoldana otyryp, áýe arqyly izdestirý is-sharalaryn uıymdastyryp keledi.

Esirtki tárkileýdiń taldaýyna súıensek, 10 jyl ishinde 230 tonnadan astam kannabıs tobynyń esirtkileri joıyldy. Joǵary kórsetkish 2015-2017 jyldary bolǵan, ol kezde 30 tonnaǵa deıin esirtki tárkilengen. 2019 jyldan bastap tómendeý baıqalady. Operatsııa barysynda quramynda esirtki bar ósimdikterdiń ósý aımaqtary anyqtaldy.

— Qaskúnemder ystyq jáne qurǵaq klımaty bar jańa egis alqaptaryn izdeı bastady. Olardyń pikirinshe, mundaı jerler polıtsııanyń nazarynan tys qalady jáne áýe barlaýymen qamtylmaıdy. Bul Túrkistan, Almaty, Jetisý, Ulytaý oblystarynyń aýmaǵy, sondaı-aq eldiń batys óńiri, — dedi ІІM esirtki qylmysyna qarsy is-qımyl departamenti.

Aıta ketý kerek, operatsııa bastalǵaly beri kannabıs tobynyń 16 tonna esirtkisi joıyldy, onyń ishinde 12 tonna qarasora, 4,2 tonna marıhýana, 450 kg gashısh bar. Tórt myń sharshy metrge jýyq esirtki egistigi joıyldy.