Sonderstiń promoýteri Golovkınniń armanyn júzege asyrýǵa daıyn

ASTANA. QazAqparat - Brıtandyq boksshy Bıllı Djo Sonderstiń (24-0, 12 KO) promoýteri Frenk Ýorren qazaqstandyq Gennadıı Golovkınmen (37-0, 33 KO) ótetin yqtımal aıqas týraly pikir bildirdi, dep habarlaıdy Sports.kz The Sun-ǵa silteme jasap.

«Osy aptada Bıllıge jaqsy jańalyqtar bolady dep úmittenemiz. Golovkınniń aıtýynsha, onyń armany - bes belbeýdi ıemdený. Onyń armanyn júzege asyra alamyz - bul arman emes, shyndyq. Ol bul týraly  óz menedjeri men promoýterine aıtyp, kelisimge qol qoısa bolǵany!», - dedi Ýorren.

Buryn Ýorren men Sonders Golovkınniń komandasyna shart qoıǵan edi. Alǵashynda, boksshy juma kúnge deıin GGG-diń kelisimge qol qoıǵanyn suraǵan, keıin onyń promoýteri aptanyń sońyna deıin bul másele sheshilmese, jekpe-jektiń bolmaıtynyn málimdegen.

Eske sala keteıik, Golovkınge orta salmaqtaǵy tıtýldardy biriktirý úshin  Sonderstegi WBO belbeýi ǵana jetispeı tur.