Sonderstiń promoýteri Golovkınmen alǵashqy kelissózder ótkizdi

ASTANA. QazAqparat - Brıtandyq boksshy Bıllı Djo Sonderstiń (24-0, 12 KO) promoýteri Frenk Ýorren óziniń klıentine Gennadıı Golovkın (37-0, 33 KO) - Saýl Alvares (49-1-1, 34 KO) aıqasynyń jeńimpazymen jekpe-jek uıymdastyrýǵa shyndap kiristi.  

«Endi jospar túsinikti boldy: Eger Sonders Monrony jeńse, «Kanelo»-Golovkın blokbasteriniń jeńimpazymen kezdesý úshin poýl-pozıshn bolady. Bul jónindegi aldyn ala kelissózder ótip qoıdy. Bıll aıqastaryn toqtatpaǵanyn qalaımyz, sondyqtan atalmysh eki jigittiń birimen aıqastyń datasy jeltoqsanǵa belgilenetini anyq kórinis tabýda. Sol sebepti Bıll Monromen jekpe-jeginde óz jumysyn jasaýy tıis.

«Kanelo»-Golovkın aıqasy klassıka bolatynyna kúmánim joq.  Jáne ol aıaqtala salysymen revansh ótkizý týraly úndeýler bolady, Golovkın jeńiske jetken jaǵdaıda revansh týraly tarmaq kórsetilgen. Alaıda, bul kezekti meksıkalyq merekege deıin bola qoımas, sebebi ol kelesi jyly biraq ótedi», - dep jazdy Ýorren Boxingscene.com saıtyndaǵy óz baǵanynda.

Aıta keteıik, Golovkın-Alvares jekpe-jegi 16 qyrkúıekte AQSh-tyń Las-Vegas qalasynda ótedi. Qazirdiń ózinde barlyq bıletter satylyp ketken. Ýaqyt aıyrmashylyǵyna baılanysty atalǵan jekpe-jek Qazaqstanda 17 qyrkúıek kúni tańerteń kórsetiledi.

Sol kúni Sonders Londonda kishi Vıllı Monromen (21-2, 6 KO) kezdesedi. Eske salsaq, Golovkınge óz dıvızıonyndaǵy barlyq beldiktiń basyn biriktirý úshin  Sonderstiń WBO beldigi ǵana jetispeı tur.