Sonderstiń komandasyna Golovkınniń jaraqattanyp qalǵany aıtyldy

ASTANA. QazAqparat - Brıtandyq boksshy Bıllı Djo Sonderstiń (24-0, 12 KO) promoýteri Frenk Ýorren iFL TV-ge bergen suhbatynda qazaqstandyq Gennadıı Golovkınmen (37-0, 33 KO) bolýy múmkin jekpe-jekke qatysty aıtyp berdi, dep habarlaıdy QazAqparat Sports.kz saıtyna silteme jasap.

«Bıllı aıqasqa burynǵydaı daıyn, barlyq qujattar ústel ústinde jatyr, biz olardyń qol qoıýyn kútip júrmiz. Biraq bizge Golovkınniń jaraqattanyp qalǵany aıtyldy. Bizge endi kútýge týra keledi. Bıllı bul jekpe-jektiń bolǵanyn qalaıdy, biz qoldan kelgenniń barlyǵyn jasadyq», - dedi Ýorren.

Aıta keteıik, Astana qalalyq dene shynyqtyrý jáne sport basqarmasynyń basshysy Berik Marjyqpaev bul jekpe-jek 17 shilde kúni ótetinin málim etken bolatyn. Onyń 30 myń oryndyq «Astana-Arena» stadıonynda ótetinin jáne bıletter quny shamamen 10-15 myń teńge bolatynyn aıtqan edi.

Alaıda GGG-diń menedjeri Oleg German atalǵan aqparatty joqqa shyǵardy . «Dál qazir Golovkınniń Qazaqstandaǵy jekpe-jegine qatysty eshqandaı resmı aqparat joq. Sol sebepti naqty, tipti aldyn ala datalar týraly aıtýǵa bolmaıdy. Bılet baǵasy týraly da sóz qozǵaýǵa erte. Al shildeniń 17-si kúngi dataǵa keler bolsaq, Gennadıı qatysatyn boks keshiniń senbi kúni ótetini belgili. Al shildeniń 17-si dúısenbige kelip tur. Qazir naqty aqparat joq. Aldaǵy ýaqytta qandaı da bir málimet bolsa, ony GGG komandasynyń ókilderi jarııalaıtyn bolady», - dedi German.

Sál keıin elorda ákimdigi Gennadıı Golovkınniń jekpe-jegin ótkizý týraly aqparat shyndyqqa janaspaıtynyn aıtty. Al jýrnalısterge burys aqparat bergen Astana qalasynyń dene shynyqtyrý jáne sport basqarmasynyń basshysy Berik Marjyqpaevqaeskertý jasaldy .