«Sonar-2020» respýblıkalyq týrnıri: Bas júldeni atyraýlyq búrkitshi ıelendi
ATYRAÝ. QazAqparat – Atyraýlyq búrkitshi «Sonar-2020» respýblıkalyq týrnıriniń bas júldesin ıelendi, dep habarlaıdy QazAqparat.
Almaty oblysynyń Eńbekshiqazaq aýdanyndaǵy Túrgen taýynyń jotasynda «Sonar-2020» respýblıkalyq týrnıri ótti. Bul saıysta búrkit, qarshyǵa, suńqar syndy qustaryn ushyryp, qumaı tazy júgirtken 100-den astam qusbegi baq synady. Olar 34 búrkit pen 14 tazyny saıysqa qosty.
Saıysqa Atyraý oblysynan qatysqan qusbegi Arman Ábdikárimulynyń «Naryn» atty búrkiti túlkige 16 sekýndta jetken. Sóıtip, atyraýlyq búrkitshi bas júlde – 1 mln teńgege ıe boldy.
«Bıyl «Naryn» altynshy ańǵa tústi. Saıat saıysynan udaıy júlde alyp júrmiz. Bir ret álem chempıonatynan, birneshe márte el chempıonatynan báıgege ıe boldyq. Búrkit baptaýǵa ákem bala kezimde úıretti. Saıatshylyqty áli de jalǵastyra beremin», - deıdi qusbegi Arman Ábdikárimuly.
