Sómke ishine jasyrynǵan: Frantsııada tutqyn túrmeden qashyp ketti

ASTANA. KAZINFORM — Frantsııanyń ońtústik-shyǵysyndaǵy Korba qalasyndaǵy túrmede 20 jastaǵy tutqyn erekshe jolmen qashyp ketti — ol jaza merzimi aıaqtalyp, bostandyqqa shyqqan kameralasynyń zat salǵan sómkesine jasyrynyp shyqqan.

Bul týraly BFMTV telearnasy habarlady, dep jazady Report agenttigi.

Qashý deregi túrme ákimshiligine tek kelesi kúni ǵana belgili bolǵan.

Jas jigit adam saýdasy men urlyq sııaqty birneshe qylmys úshin sottalǵan jáne uıymdasqan qylmystyq toppen baılanysy bar degen kúdikpen tergelip jatqan. Ol otyrǵan kamerada taǵy eki tutqyn bolǵan, solardyń biri 11 shildede bosatylǵan.

Oqıǵaǵa baılanysty túrme ishindegi tekseris bastaldy. Túrme basshysy Sebasten Kovel BFMTV-ge bergen suhbatynda bul oqıǵany «óte sırek kezdesetin jaǵdaı» dep baǵalap, ol «birqatar aýyr zańbuzýshylyqtyń belgisi» ekenin aıtty.

Qashý faktisin túrme ákimshiligi oryn tapshylyǵyna baılanysty baıqamaı qalǵan bolýy múmkin. Túrme ókili BFMTV-ge bergen málimetinde mekeme 170% tolǵanyn jetkizdi.

Sonymen qatar, Frantsııanyń Rona departamentindegi Ulttyq polıtsııanyń vedomstvoaralyq basqarmasy (DIPN) qashýǵa qatysty tergeý júrgizip jatyr.

Aıta keteıik, buǵan deıin Aýstralııada túrmedegi adamdar sany rekordtyq deńgeıge jetkenin jazdyq.