Somdaıtyn rólińdi balańdaı jaqsy kórýiń kerek - aktrısa Sulýshash Tólekova
SEMEI. QazAqparat - Halyqaralyq Shabyt festıvaliniń laýreaty, sahna sheberi Sulýshash Tólekova sanaly ǵumyryn ónerge arnaǵan jannyń biri. Búginde Semeıdegi Abaı atyndaǵy qazaq mýzykaly-drama teatrynyń bedeldi aktrısasy. Bıyl sahnada óner kórsetip kele jatqanyna 25 jyl toldy, dep habarlaıdy QazAqparat.
Sulýshash Tólekova 1974 jyly 16 jeltoqsan kúni Abaı aýdany, Sarjal aýylyndaǵy Tórebaı qystaǵynda dúnıege kelgen. Mektep jasyna deıin aýylda ósedi. Al oqý-bilimdi Semeıdegi burynǵy №1 mektep-ınternaty, qazirgi №15 orta mektepte alady.
Mektep jasynan boıyndaǵy talantyn shyndaýǵa tyrysqan bolashaq aktrısa óz armany jaıly eshkimge tis jarmaǵan. «Munyń da óz sebebi boldy. Eger armanymdy aıtsam, oryndalmaıdy dep qoryqtym», - deıdi aktrısa. Sóıtip, mektepti tamamdaǵannan keıin, arman qýyp Almatyǵa barady. Biraq teatr ınstıtýtyna oqýǵa túse almaı, Semeıge qaıtyp keledi. Keıinnen Abaı atyndaǵy teatrdyń janynan stýdııa ashylyp, sonda 2 jyl bilim alady. Al joǵary oqý ornyn syrttaı bitirip shyǵady. Óziń aktrısa retinde ǵana elestetken Sulýshash bala armanyna osylaı qol jetkizedi. Bıyl sahnaǵa qadam basqanynan da 25 jyl bolypty.
«Eń alǵash úlken sahnaǵa Tahaýı Ahtanovtyń «Kúshik kúıeýi» spektaklinde erke qyz - Botkanyń rólin oınap shyqtym. Bul meniń dıplomdyq jumysym bolatyn. Barlyq somdaǵan rólderimdi jaqsy kóremin. Balańdy qalaı jaqsy kórseń, rólińdi de solaı jaqsy kórýiń kerek. Áıtpese, kórermenge jete qoıýy ekitalaı. Tek bir áttegen-aıym bar. Aqtotynyń róli buıyrmady», - deıdi Sulýshash Tólekova.
Sulýshash teatrǵa kelisimen-aq, myqty aktrısa bola alatyndyǵyn kórsetti bilgen. Alǵashqy sahnalyq eńbegin ertegi keıipkerlerinen bastap, keıinnen úlken beınelerge jalǵastyrdy. Búginde Sulýshash 70-ke tarta obrazdardy somdaǵan. «Qaragózdegi» - Qaragóz, «Aıman-Sholpandaǵy» - Sholpan, «Qara qypshaq Qobylandydaǵy» - Qarlyǵash, «Domalaq anadaǵy» - Domalaq ana, «Kúshik kúıeýdegi» - Botka, «Mahabbat muńyndaǵy» - Baǵıla, «Mahabbat qyzyq, mol jyldardaǵy» - Meńtaı, «Qosh bol, Gúlsarydaǵy» - Búbijan, «Ahmettiń amanatyndaǵy» - Badrısafa taǵy da basqa tulǵalardy sheber somdaǵan sahna sheberi. 
«Sońǵy úsh jylda komedııalarda oınap júrmin. Qandaı ról buıyrady, sony bar júregimmen sezinip, barynsha shynaıy oınaýǵa tyrysamyn. Eń bastysy kórermenniń kóńilinen shyǵý. Teatr maǵan bárin berdi. Meni Sulýshash etip osyndaı dárejege jetkizgen de - teatr. Ómirge de, ónerge de úıretti. Shama-sharqym kelgenshe teatrdyń shyraǵyń sóndirmeı, qazaq ónerine ári qaraı úlesimdi qossam, armanym joq», - deıdi aktrısa.
