Somalıdegi sý tasqynynan qaza tapqandar sany 100-ge jýyqtady

Somalıdegi tolassyz jaýǵan jańbyrdan keıingi sý tasqynynan qaza tapqandar sany 96-ǵa jetti, dep habarlaıdy Kazinform Reuters agenttigine silteme jasap.

- Somalıdegi sý tasqynynan qaza tapqandar sany 96-ǵa jetti. Muny tabıǵı apattarmen kúres jónindegi agenttik basshylyǵy rastady, delingen SONNA-nyń H áleýmettik jelisindegi habarlamasynda.

BUU málimetinshe, onjyldyqtaǵy eń joıqyn sý tasqyny 700 myńǵa jýyq adamdy úılerin tastap ketýge májbúr etti.

Kenııa Qyzyl Krest uıymynyń málimetinshe, kórshiles Kenııada sý tasqynynan 76 adam qaza tapty.

«Shekarasyz dárigerler» (MSF) uıymy taratqan málimetke súıensek, kóptegen joldar men kópirler qırap, turǵyndar baspanasyz, aýyz sýsyz jáne azyq-túliksiz qalǵan.

Buǵan deıin sý tasqyny Somalıdegi beıitter men kópirdi shaıyp ketken bolatyn.