Somalıde kúshti qurǵaqshylyqtan júzdegen myń adam zardap shekti — BUU

ASTANA. KAZINFORM — Somalıdiń ortalyq jáne soltústik aımaqtarynda bolǵan kúshti qurǵaqshylyqtan júzdegen myń adam zardap shekti, dep habarlaıdy Sınhýa.

Bul týraly BUU Bas hatshysynyń resmı ókiliniń orynbasary Farhan Hak sársenbi kúndelikti brıfıngte málimdedi.

Onyń aıtýynsha, BUU Azyq-túlik jáne aýyl sharýashylyǵy uıymy (FAO) júrgizgen taldaý nátıjeleri boıynsha, 16 okrýgtegi qatty zardap shekken aýdandarda 880 myńnan astam adam ómir súrip jatyr.

BUU mekemeleri men seriktesteri Pýntlend pen Somalılend óńirlerinde negizgi qajettilikterdi anyqtaý úshin birlesken baǵalaý jumystaryn júrgizip jatyr. Aldyn ala esepter kórsetkendeı, azyq-túlik qaýipsizdiginiń nasharlaýy, sý men jaıylymdarǵa qol jetkizýdiń azaıýy, sondaı-aq kúnkóris kózderiniń úzilýi sııaqty máseleler ýshyǵyp keledi.

BUU Gýmanıtarlyq uıymdarynyń málimetinshe, qudyqtar tartylyp qalǵan, 160-tan astam sý uńǵymasy jumysyn toqtatqan. Malshylar maldaryn aman saqtap qalý úshin óz tabyndarymen basqa óńirlerge kóshýge májbúr.

Farhan Haktyń aıtýynsha, BUU qamqorlyǵyndaǵy gýmanıtarlyq qor Somalıdegi adamdardyń ómirin qutqarýǵa baǵyttalǵan shuǵyl qajettilikterdi óteý úshin qarajat bólýdi josparlap otyr.

Alaıda kómek kólemin arttyrý josparyna negizgi donorlardyń qarjylandyrýdy qysqartýy kedergi keltirip otyr. Jalpy quny 1,4 mıllıard AQSh dollaryna baǵalanǵan Somalıge arnalǵan gýmanıtarlyq qajettilikter men áreket etý jospary qazirgi tańda tek 17%-ǵa nemese 242 mıllıon dollarǵa ǵana qarjylandyrylǵan.

Osyǵan deıin BUU Somalıge qoldaý kórsetý úshin 1,6 mlrd dollarlyq gýmanıtarlyq josparyn iske qosqany habarlandy.