Somalıde 6,5 mıllıonnan astam adam azyq-túlik tapshylyǵyna tap boldy
ASTANA. KAZINFORM – BUU-nyń Somalı boıynsha gýmanıtarlyq máseleler jónindegi úılestirýshisi Djordj Konveı elde qurǵaqshylyq saldarynan ashtyq pen durys tamaqtanbaýǵa baılanysty daǵdarys barǵan saıyn kúsheıip jatqanyn málimdedi, dep habarlaıdy Anadoly.
Onyń aıtýynsha, shamamen 6,5 mıllıon adam ótkir azyq-túlik tapshylyǵyna tap bolýy múmkin.
Somalıge sapary aıasynda Konveı úkimet ókilderimen, BUU toby jáne gýmanıtarlyq uıymdar ókilderimen kezdesý ótkizdi.
Ol eldegi jaǵdaıdyń qanshalyqty kúrdeli ekenin kórý úshin túrli aımaqtardy aralaǵanyn aıtty. Konveıdiń sózinshe, qurǵaqshylyqtan týyndaǵan ashtyq pen durys tamaqtanbaý daǵdarysy barǵan saıyn aýyrlap barady.
Sonymen qatar ol Somalıde sońǵy úsh jyl boıy jaýyn-shashynnyń az túsýi saldary baıqalyp otyrǵanyn jetkizdi. Keı óńirlerde jańbyrdyń bastalýy úmit syılaǵanymen, gýmanıtarlyq jaǵdaıdy aıtarlyqtaı jaqsarta almaǵan.
Qazirgi tańda elde shamamen 6,5 mıllıon adam azyq-túlik qaýipsizdiginiń aýyr nemese óte aýyr máselesine tap bolsa, onyń ishinde 2 mıllıonǵa jýyq adam ashtyqtan zardap shegip otyr.
Aıta ketelik Somalıde mıllıondaǵan adam ashtyqtyń zardabyn tartyp otyrǵany týraly jazǵan edik.
