Somalıde 3,3 mıllıonnan astam adam úıin tastap ketýge májbúr boldy
ASTANA. KAZINFORM — Somalıde qurǵaqshylyq, sý tasqyny jáne zorlyq-zombylyq saldarynan turǵyndar úılerin tastap, basqa jerlerge kóshýge májbúr. Bul eldegi gýmanıtarlyq jaǵdaıdy odan ári ýshyqtyryp otyr. Bul týraly BUU-nyń Gýmanıtarlyq máselelerdi úılestirý basqarmasy (OCHA) málimdedi, dep habarlaıdy Sınhýa.
Qazir el boıynsha 3,3 mıllıonnan astam adam qonys aýdarǵan. Olardyń basym bóligi — áıelder, balalar men qarttar. BUU-nyń Bosqyndar isi jónindegi agenttiginiń derekterine súıengen OCHA málimetinshe, qańtar-qyrkúıek aılary aralyǵynda 800 myńnan astam adam úıin tastap ketýge májbúr bolǵan. Olardyń 70 paıyzyna qurǵaqshylyq sebep boldy.
Vedomstvonyń eskertýinshe, El-Nıno qubylysyna baılanysty boljanyp otyrǵan sý tasqyny jeltoqsanǵa deıin júzdegen myń adamnyń qonys aýdarýyna ákelýi múmkin.
Tek ótken aıda sý tasqynynan 17,5 myńnan astam adam baspanasyn tastap ketýge májbúr bolsa, tabıǵı apat 170 myńnan astam turǵynǵa áser etken. Sonymen qatar qyrkúıek pen qazan aılarynda Baı jáne Barı óńirlerindegi zorlyq-zombylyq saldarynan shamamen 9,5 myń adam qonys aýdarǵan.
— Halyqtyń qonys aýdarýy adamdardyń zorlyq-zombylyqqa, qanaýǵa jáne qatygezdikke ushyraý qaýpin arttyrady. Ásirese áıelder men qyzdar, balalar, múmkindigi shekteýli adamdar jáne qoǵamdaǵy sany az toptardyń ókilderi osal jaǵdaıda qalady, — delingen qujatta.
Halyqaralyq Qyzyl Krest komıtetiniń (HQKK) málimetinshe, Ońtústik-Batys federaldyq shtatyna qarasty Baı jáne Bakýl óńirleri azyq-túlik tapshylyǵynan eń kóp zardap shekken aımaqtardyń qatarynda. Naýryzdan beri kúsheıgen qarýly qaqtyǵys qurǵaqshylyqtyń zardabyn áli tartyp otyrǵan jergilikti turǵyndardyń jaǵdaıyn odan ári qıyndatýy múmkin.
— Halyqtyń jappaı qonys aýdarýy, azyq-túlik tapshylyǵy jáne gýmanıtarlyq kómektiń qysqarýyna baılanysty medıtsınalyq kómekke qoljetimdiliktiń shektelýi, sonyń saldarynan emhanalardyń jabylýy jaǵdaıynda aldaǵy jańbyr onsyz da qıyndyq kórip otyrǵan otbasylarǵa qosymsha aýyrtpalyq túsirýi múmkin, — dep málimdedi Halyqaralyq Qyzyl Krest komıtetiniń ókilderi.
OCHA gýmanıtarlyq kómekti qarjylandyrý tapshylyǵy saldarynan Somalıge kórsetiletin kómektiń kólemi qysqaryp jatqanyn habarlady. Qarjynyń jetispeýine baılanysty azyq-túlik kómegin alatyndar sany qańtardaǵy 1,1 mıllıon adamnan maýsymda shamamen 600 myń adamǵa deıin azaıǵan.
Bıyl qarjy tapshylyǵyna baılanysty 233 tamaqtandyrý pýnkti men 380 medıtsınalyq mekeme jabylǵan nemese kórsetetin qyzmet kólemin qysqartqan. Al Somalıge arnalǵan gýmanıtarlyq kómek josparyna qajetti 852 mıllıon dollardyń ázirge 36 paıyzy ǵana qarjylandyrylǵan.
Buǵan deıin BUU Gazada 2 mıllıonǵa jýyq adam baspanaǵa muqtaj ekenin habarlady.