Somalı Ramazan aıynyń qurmetine teńiz qaraqshylaryna raqymshylyq jasamaq
ASTANA. 6 tamyz. QazAqparat - Somalı bıligi 2 myńnan astam teńiz qaraqshylaryna raqymshylyq jasamaq. Biraq bul úshin olar kepilge alǵan adamdardy bosatyp, basyp alǵan kemelerdi qaıtarýy tıis.
El prezıdenti Sharıf Ahmed osylaı dep málimdegen. Bul týraly «The Times»-qa silteme jasap www.muslim.kz saıty jazyp otyr.
Sharıf Ahmed: «Qoǵamnyń durys múshesi bolǵysy keletinderge qushaǵymyz ashyq. Qaraqshylyqty tastaǵandardyń qylmystary keshiriledi», - degen eken. Áıtse de, atalmysh usynystyń merzimi shekteýli. Ol Ramazan aıynan keıin 20 tamyzda kúshin joıady. Eýropalyq odaqtyń málimeti boıynsha, qazir somalılik teńiz qaraqshylary shamamen 245 adamdy kepildikte ustap otyr. Al pırattardyń jyl saıyn álemdik ekonomıkaǵa keltiretin shyǵyny shamamen 12 mıllıard dollardy quraıdy eken.
Buǵan deıin baspasóz betinde Sharıf Ahmedtiń qaraqshylardyń atyshýly basshysy Mohamed Abıde Hasanǵa dıplomatııalyq tólqujat bergeni týraly jazylǵan bolatyn. Mundaı qadam bas qaraqshynyń teńiz qaraqshylyǵynan birjola bas tartýy úshin jasalǵan. Jýrnalıster mundaı málimetti Birikken Ulttar Uıymynyń qujattarynan aldy.
