Somalı qaraqshylarynyń kóshbasshysy Belgııada tutqyndaldy
ASTANA. 14 qazan. QazAqparat - Somalı qaraqshylary tobynyń kóshbasshysy, Afveın laqap atymen tanymal Mohammed Abdı Hassan Brıýsseldegi halyqaralyq áýejaıda polıtsııa qyzmetkerleriniń qolyna tústi.
M.Hassan Kenııanyń Naırobı qalasynan kelgen ushaq bortynan túsken kezde ustaldy. Osydan keıin kúdikti Belgııanyń Brıýgt qalasyna jetkizilip, sýdıa ony qaraqshylyq jasaý kúdigimen tutqynǵa alý týraly sheshim qabyldady.
BUU baıandamalarynda Afveın men onyń uly sońǵy jyldary Somalı jaǵalaýlarynda qaraqshylyqpen aınalysatyn eń tanymal ári qýatty qaraqshy retinde atalady. Sarapshylardyń baǵalaýynsha, ol 2005 jyldan beri qaraqshylyq kásibimen mıllıon dollar paıda tapqan.
M.Hassannyń Belgııaǵa ne úshin kelgendigi belgisiz. Degenmen, ótken jyly qaraqshylar basshysy óziniń aram isterin qoıyp, saıasatqa bet buratyndyǵyn málimdegen edi.
