Soltústikte boran, ońtústikte aıaz: aldaǵy kúnderge arnalǵan aýa raıy boljamy

ASTANA. KAZINFORM — «Qazgıdromet» RMQ 4-6 qarasha kúnderine arnalǵan aýa raıy boljamyn jarııalady. 

Sınoptıkterdiń boljamynsha, aldaǵy kúnderi respýblıka aýmaǵy Atlant muhıtynan keletin tsıklonnyń yqpalynda bolady.

— Eldiń basym bóliginde jaýyn-shashyn (negizinen qar) men jeldiń kúsheıýin týdyrady. Respýblıka boıynsha tuman, kóktaıǵaq, al soltústik óńirlerde jaıaý burqasyn kútiledi, — delingen habarlamada.

Tek respýblıkanyń batys aımaǵynda ǵana jaýyn-shashynsyz aýa raıy saqtalady.

— Ońtústik óńirlerde atmosferalyq fronttardyń ótýine baılanysty qatty jaýyn-shashyn (jańbyrdyń qarǵa aýysýy) kútiledi, al respýblıkanyń soltústik bóliginde keı jerlerde kúshti qar jaýady, — dep jazdy «Qazgıdromet» RMQ.

Aýa temperatýrasynyń kúndizgi ýaqytta kúrt tómendeýi boljanady: soltústik pen ortalyqta –2…–10°S, ońtústik jáne ońtústik-shyǵysta +2…+7°S shamasynda bolady.