Soltústikte aıaz, ońtústikte shańdy daýyl: aýa raıyna boljam qandaı

ASTANA. KAZINFORM — «Qazgıdromet» RMQ aldaǵy kúnderge arnalǵan aýa raıy boljamyn jarııalady.

Sınoptıkterdiń boljamynsha, Qazaqstannyń basym bóliginde ashyq aýa raıy kútiledi.

Aldaǵy kúnderi eldiń kóptegen óńirlerinde soltústik-batys antıtsıklonynyń áserinen jaýyn-shashynsyz, ashyq aýa raıy saqtalady. Tek respýblıkanyń soltústigi men shyǵysynda atmosferalyq fronttardyń ótýine baılanysty jańbyr men qar túrinde jaýyn-shashyn kútiledi. El aýmaǵynda jeldiń kúsheıýi, tuman, al ońtústik-batysta jáne ońtústikte — shańdy daýyl boljanady.

Túngi ýaqytta soltústik jáne ortalyq óńirlerde aýa temperatýrasy 1–7 gradýs aıazǵa deıin tómendeıdi, al kúndiz 4–16 gradýs jyly bolady. Shyǵys óńirlerde túnde aýa temperatýrasy 5–13 gradýs aıazǵa deıin tómendep, kúndiz 3–11 gradýs jyly bolady dep kútiledi. Qalǵan aýmaqtarda aýa temperatýrasynyń birtindep joǵarylaýy boljanady.

Aıta keteıik, aýa raıyna baılanysty birqatar óńirde eskertý jarııalandy.