«Soltústik–Ońtústik» kólik dálizindegi júk tasymaly kólemi 20 mln tonnaǵa jetkizilmek
ASTANA. KAZINFORM — Qazaqstan «Soltústik–Ońtústik» kólik dálizindegi júk tasymaly kólemin arttyrý úshin birqatar jobalardy qolǵa aldy. Bul týraly Kólik saıasaty departamentiniń dırektory Dinmuhamed Sembaev aıtty.
— «Soltústik–Ońtústik» dálizi — Reseı Federatsııasyn Iran, Úndistan jáne Parsy shyǵanaǵy elderimen baılanystyratyn bolashaǵy zor baǵyt. Onyń Shyǵys tarmaǵymen jylyna 10 mln tonna júk tasymaldanady, onyń ishinde 6 mıllıon tonnasy — Bolashaq stantsııasy arqyly, al 4 mıllıon tonnasy — Kaspıı mańyndaǵy porttar arqyly ótedi, — dedi ol Qazaqstannyń eksporttaýshylar forýmynda.
Sondaı-aq spıker Qazaqstan aýmaǵy arqyly tasymal kólemin arttyrtý maqsatynda tranzıttik júkterge 50% jeńildik baryn atap ótti.
— Qazaqstan, Reseı, Túrikmenstan jáne Iran aýmaqtary arqyly ótetin halyqaralyq kólik dáliziniń «Soltústik — Ońtústik» shyǵys baǵytynyń áleýetin úılesimdi damytý jónindegi 2024–2025 jyldarǵa arnalǵan Jol kartasy bekitildi. Sonymen qatar, Qazaqstan Respýblıkasy, Reseı Federatsııasy jáne Túrikmenstannyń temirjol ákimshilikteri birlesip, «Soltústik — Ońtústik» halyqaralyq kólik dáliziniń shyǵys baǵyty boıynsha «Biryńǵaı logıstıkalyq operator» jobasyn iske asyrý jumystaryn júrgizip jatyr. Budan bólek, Qazaqstannyń batys óńirlerindegi shekara mańyndaǵy stantsııalardy damytý boıynsha jumystar júrgizilip jatyr, olardy aıaqtaý kelesi jylǵa josparlanǵan, — dedi Dinmuhamed Sembaev.
Onyń sózinshe, jalpy alǵanda osy jumystardyń nátıjesinde dálizdiń ótkizý qabileti jylyna 20 mıllıon tonnaǵa jetedi.
Aıta ketsek, Qazaqstan kólik-logıstıkalyq ınfraqurylymdy damytýǵa sońǵy 15 jylda 35 mlrd dollar ınvestıtsııalady.
Al 2027 jyly Transkaspıı kólik baǵytynyń júk ótkizý kólemi 10 mln tonnaǵa jetedi.