Soltústik jáne shyǵys óńirlerdi gazdandyrýdyń eki jolyn qarastyryp otyrmyz – mınıstr

ASTANA. KAZINFORM – Qazaqstannyń soltústik jáne shyǵys óńirlerin gazdandyrý boıynsha Reseımen kelissóz qaı deńgeıde júrip jatyr? Bul saýalǵa Energetıka mınıstri Almasadam Sátqalıev jaýap berdi.

- Kelissózder boıynsha oń dınamıka baıqalady. Elimizdiń soltústik jáne shyǵys óńirlerin gazdandyrýdyń eki stsenarııi qarastyrylyp otyr. Birinshi stsenarıı boıynsha Reseı–Qytaı tranzıttik gaz qubyry arqyly Qazaqstan aýmaǵynan ótetin marshrýt. Bul jaǵdaıda elimizge jylyna 10 mlrd tekshe metrge deıin gaz alý múmkindigi týady. Biraq, bul qubyr boıynsha sheshim Reseı men Qytaıǵa tikeleı baılanysty. Eger oń sheshim qabyldansa, Qazaqstan bul jobany júzege asyrýǵa múddeli jáne kelisilgen sharttar negizinde óz aýmaǵyn usynýǵa daıyn, - dedi Almasadam Sátqalıev vedomstvonyń keńeıtilgen alqa otyrysynan keıin ótken baspasóz máslıhatynda.

Energetıka mınıstri usynyp otyrǵan ekinshi múmkindik «Saryarqa» gaz qubyryn keńeıtý. 

- Bul baǵytta da joǵary daıyndyq júrip jatyr. «QazTransGaz» kompanııasy aldyn ala tehnıkalyq-ekonomıkalyq negizdemeni (TEN) ázirlep jatyr. Qazaqstan tarapy tranzıttik gaz qubyry boıynsha sheshimniń anyqtyǵyna baılanysty tıisti sheshimder qabyldaıtyn bolady, - dedi ol.

Buǵan deıin Qazaqstanǵa gaz jetkizetin qubyr Reseı shemasyna engizilgeni týraly habarlaǵan edik. 

RF Úkimeti Reseı Federatsııasynyń Federaldy kólik salasyndaǵy aýmaqtyq josparlaý shemasyna ózgerister engizdi (qubyr kóligi bóliginde), oǵan sáıkes Qazaqstandy gazdandyrý úshin 10 mıllıard tekshe metrge magıstraldy gaz qubyryn salý josparlanǵan.