Soltústik, ortalyq, batys jáne shyǵys: 4 óńirdegi sý qoımalary jappaı sý jiberip jatyr
ASTANA. KAZINFORM – Elimizdiń soltústik, batys, ortalyq jáne shyǵys óńirlerindegi sý qoımalary kóktemde tasqyn sýdy qabyldaýǵa daıyn bolý úshin jappaı sý jiberip jatyr. Bul týraly Sý resýrstary jáne ırrıgatsııa mınıstrliginiń Kazinform agenttiginiń saýalyna jaýabynda aıtylǵan.
Vedomstvo málimetinshe búgingi tańda barlyq sý qoımalary belgilengen rejımge sáıkes jumys istep tur jáne syıymdylyǵyn arttyrý mynandaı sharalary júrgizilip jatyr:
- Astana sý qoımasyndaǵy sý kólemi 81%-ǵa deıin tómendetildi. 1 sáýirge deıin qoımadaǵy sý kólemin 300 mln tekshe metrge nemese 73%-ǵa deıin azaıtýdy josparlanyp otyr
- Aqtóbe sý qoımasynda 51 mln tekshe metrge jýyq sý bar. 1 sáýirge deıin ol 47,32 mln tekshe metrge deıin azaıtylady
- Batys Qazaqstan oblysyndaǵy Bitik qoımasynda sý kólemi 28,11 mln tekshe metrge deıin azaıtyldy. Búgingi tańda sý qoımasynan sekýndyna 4,8 tekshe metr sý jiberilip jatyr
- Shyǵys Qazaqstan oblysyndaǵy Buqtyrma sý qoımasy 78% tolyp tur. 1 sáýirge deıin qoımadaǵy sý kólemi taǵy 8%-ǵa azaıtylady
- Qaraǵandy oblysyndaǵy Yntymaq sý qoımasynda 63,5 mln tekshe metr sý bar. Kóktemde tasqyn sýyn qabyldaý úshin sý qoımasyn 39%-ǵa deıin bosatý josparlanyp otyr
- Ulytaý oblysyndaǵy Keńgir qoımasyndaǵy sý kólemi 85%-ǵa deıin azaıtyldy. Kóktemge deıin ony taǵy 11%-ǵa jýyq bosatý josparda bar;
- Qostanaı oblysyndaǵy Joǵarǵy Tobyl sý qoımasynda 585,4 mln tekshe metr sý bar. 1 sáýirge deıin sý kólemi 499,37 mln tekshe metrge nemese 61%-ǵa deıin azaıtylady.
Mınıstrlik ońtústik óńirdegi sý qoımalary kerisinshe jumys isteıtinin atap ótken.
— Soltústik, batys, ortalyq jáne shyǵys óńirlerindegi sý qoımalary 2025 jylǵy sý tasqyny kezeńine qajet syıymdylyqty qamtamasyz etý úshin «sý jiberý» rejıminde jumys isteıtin bolady. Al ońtústik óńirlerdiń sý qoımalary kerisinshe «sý jınaý» rejıminde jumysyn jalǵastyrady. Barlyq rejımder «Qazgıdromet» RMK-nyń boljamdaryna baılanysty túzetiletin bolady, - delingen habarlamada.
Aıta keteıik, buǵan deıin vedomstvo elimizdiń barlyq sý qoımalary sý tasqyny kezeńine daıyndalyp jatqanyn habarlaǵan bolatyn.