Soltústik óńirlerge qonys aýdarý: bıyl qandaı memlekettik qoldaý kórsetiledi
ShYMKENT. KAZINFORM – Basqa óńirge kóship barǵan azamattarǵa aýqymdy qarjylyq jáne áleýmettik qoldaý qarastyrylǵan. Atap aıtqanda, ár adamǵa 300 myń teńgeden astam birjolǵy kómek tólenip, aı saıynǵy turǵyn úı jaldaý shyǵyndary óteledi. Sonymen qatar, jumysqa ornalasýǵa kómek kórsetilip, 7 mln teńgege deıin turǵyn úı satyp alýǵa sertıfıkat usynylady.
Kóshýge nıet bolsa, kásip tabylady
Qonys aýdarý baǵdarlamasy eńbek resýrstaryn óńirler arasynda tıimdi bólýge baǵyttalǵan. Ońtústik oblystarda jumys kúshi artyq bolsa, soltústik jáne ózge de óńirlerde kadr tapshylyǵy baıqalady. Memleket kóshý shyǵyndaryn azaıtyp, azamattardyń jańa jerde turaqty jumys tabýyna jaǵdaı jasaıdy.
Jumyspen qamtý jáne áleýmettik qorǵaý basqarmasynyń málimetinshe, baǵdarlama qatysýshylaryna keshendi qoldaý kórsetiledi. Bul kóshý protsesin jeńildetip, jańa ortaǵa beıimdelýdi jedeldetedi.
– Baǵdarlama birneshe baǵyttaǵy kómekti qamtıdy. Eń aldymen, kóshýge baılanysty negizgi shyǵyndardy jabatyn birjolǵy tólem qarastyrylǵan, – dedi vedomstvo ókilderi.
Birjolǵy tólem ár otbasy múshesine 70 AEK mólsherinde qarastyrylǵan. 2026 jyly onyń kólemi bir adamǵa – 302 750 teńge.
Aýylda da, qalada da qoldaý bar
Qatysýshylarǵa turǵyn úıdi jalǵa alý jáne kommýnaldyq qyzmetter shyǵyny da óteledi. Bul tólemder bir jyl boıy aı saıyn rastaıtyn qujattar negizinde beriledi.
– Tólem kólemi otbasy quramyna jáne turatyn jerine baılanysty ózgeredi. Qalalarda somasy joǵaryraq, al aýyldyq jerlerde sál tómenirek bolady, – dep túsindirdi mamandar.
Qalaǵa qonys aýdarǵandar úshin:
- 1 adamǵa – 20 AEK (86 500 teńge);
- 2-4 adamnan turatyn otbasyǵa – 25 AEK (108 125 teńge);
- 5 jáne odan kóp adamǵa – 30 AEK (129 750 teńge).
Aýyldyq jerler úshin:
- 1 adamǵa – 15 AEK (64 875 teńge);
- 2-4 adamǵa – 18 AEK (77 850 teńge);
- 5 jáne odan kóp adamǵa – 21 AEK (90 825 teńge).
Shymkentte jumyssyzdardyń sany ósken
Baǵdarlama tek qarjylaı kómekten turmaıdy. Qatysýshylarǵa jumys oryndary usynylyp, qajet bolǵan jaǵdaıda kásibı oqytýǵa jiberiledi. Sondaı-aq shaǵyn nesıe berý arqyly jeke kásip bastaýǵa múmkindik qarastyrylǵan.
– Negizgi maqsat – azamatty kóshirý ǵana emes, onyń turaqty tabys tabýyna jaǵdaı jasaý. Biz qatysýshylarǵa jumysqa ornalasýyna jáne turaqty tabys kózin qalyptastyrýǵa kómektesemiz, – dedi mamandar.
Budan bólek, qonys aýdarýshylar men qandastarǵa turǵyn úı satyp alý úshin ekonomıkalyq utqyrlyq sertıfıkaty beriledi.
– Sertıfıkat turǵyn úı qunynyń 50 paıyzyna deıin qamtıdy, biraq 1625 AEK-ten aspaıdy. Bul shamamen 7 028 125 teńge, – dep naqtylady vedomstvo.
Statıstıkaǵa sáıkes, 2026 jylǵy 1 naýryzdaǵy jaǵdaı boıynsha Shymkentte 17 293 jumyssyz tirkelgen. Bul jumys kúshiniń – 3,6 paıyzy. Bir aı buryn bul kórsetkish 13 888 adam nemese 2,9 paıyz bolǵan.
Qalada basty nazar qaıta daıarlaý men jedel jumysqa ornalastyrýǵa bólingen. Jumyssyzdar qysqa merzimdi kýrstardan ótip, shákirtaqy nemese jalaqy alady. Oqytý naryqta suranysqa ıe tiginshi, esepshi-kassır, aspaz, kondıter, shashtaraz-stılıst, kompıýter operatory, ofıs-menedjer, dızaıner mamandyqtary boıynsha júrgiziledi.
Aıta keteıik, 2025 jyly Shymkentten 700-ge jýyq adam eńbek kúshi tapshy óńirlerge qonys aýdarǵan. Olardyń basym bóligi Pavlodar oblysyn tańdaǵan.
