Soltústik óńirlerdi tasqynnan qorǵaıtyn strategııalyq nysan qurylysy bastalmaq
ASTANA. KAZINFORM — Kelesi jyly Aqmola jáne SQO-ny sý tasqynynan qorǵaıtyn Esil kontrrettegishiniń qurylysy bastalady, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Sý resýrstary jáne ırrıgatsııa mınıstri Nurjan Nurjigitov Aqmola oblysynyń ákimi Marat Ahmetjanovtyń qatysýymen Esil kontrrettegishin salý jobasyn iske asyrýǵa arnalǵan kóshpeli keńes ótkizdi.
Byltyr qazan aıynda Soltústik Qazaqstan jáne Aqmola oblystaryndaǵy eldi mekenderdi sý tasqynynan qorǵaýǵa baǵyttalǵan joba memlekettik saraptamadan ótken bolatyn. Kontrrettegishtiń jalpy syıymdylyǵy — 873,41 mln tekshe metr. Bógettiń uzyndyǵy — 3443 metr. Qurylys-montaj jumystary kelesi jyly bastalady dep josparlanyp otyr. Kontrrettegish tasqyn sýdy jınaqtap, retteýge múmkindik beredi. Bul Esil ózeniniń tómengi aǵysynda sýdyń qaýipsiz ótýin qamtamasyz etip, Soltústik Qazaqstan oblysyndaǵy Sergeev jáne Petropavl sý qoımalarynyń turaqty jumys isteýine jaǵdaı jasaıdy. Sonymen qatar ózen jaıylmasyndaǵy ekologııalyq ahýaldy jaqsartady.
Budan bólek, nysan Aqmola oblysyndaǵy 25 myń gektar sýarmaly jerdi sýmen qamtamasyz etýge múmkindik beredi. Nurjan Nurjigitov Esil kontrrettegishin salý josparlanǵan aýmaqqa baryp, daıyndyq jumystarynyń barysymen tanysty.
— Bul — Sý resýrstaryn basqarý júıesin damytý tujyrymdamasy aıasynda júzege asyrylyp jatqan strategııalyq mańyzy zor joba. Onyń aýqymy men Aqmola jáne Soltústik Qazaqstan oblystarynyń qaýipsizdigin qamtamasyz etýdegi mańyzyn eskere otyryp, barlyq josparlanǵan jumystyń sapaly ári ýaqytyly oryndalýyn qamtamasyz etý qajet. Esil kontrrettegishi Memleket basshysynyń tasqyn sýdy jınaqtaý jáne tıimdi paıdalaný jónindegi tapsyrmasyn iske asyrýdaǵy mańyzdy qadam bolmaq, — dedi Sý resýrstary jáne ırrıgatsııa mınıstri.
Aqmola oblysyna jumys sapary kezinde Nurjan Nurjigitov Tselınograd aýdanyndaǵy Pokrovka jerasty sý ken ornynan Talapker jáne Qajymuqan aýyldaryna deıin tartylyp jatqan sý qubyrynyń qurylysymen de tanysty.
Qazir merdiger uıym joba boıynsha qarastyrylǵan 19 uńǵymanyń barlyǵyn burǵylaý jumystaryn aıaqtady. Josparlanǵan 86,5 shaqyrymnyń 83,5 shaqyrymyna qubyr tóselip, elektrmen jabdyqtaýǵa arnalǵan 597 temirbeton tirektiń 437-si ornatyldy. Búginde nysanda birinshi jáne ekinshi kótergish sorǵy stantsııalarynyń, sý tazartý stantsııasynyń, sondaı-aq bastapqy jáne taza sý rezervýarlarynyń qurylysy júrgizilip jatyr. Barlyq qurylys-montaj jumystyn jyl sońyna deıin aıaqtaý josparlanǵan. Joba júzege asqannan keıin Talapker, Qajymuqan jáne Tóńkeris aýyldary ortalyqtandyrylǵan aýyz sýmen qamtylyp, Araıly aýylyndaǵy sýmen jabdyqtaý júıesi jaqsarady.
Odan keıin mınıstr Sandyqtaý aýdanyna baryp, Krasnaıa Polıana, Petrıkovka jáne Arbýzınka aýyldaryn sýmen qamtý júıesiniń qurylysy qalaı júrip jatqanymen tanysty. Qazirgi tańda joba aıasynda 22,1 shaqyrym qubyr jelisi tolyq tartylyp, sý alý qurylǵysy men sý qubyry nysandarynyń eki alańy salynǵan. Qosymsha eki uńǵymany burǵylaý jumystary júrgizilip jatyr. Jobany bıyl aıaqtaý josparlanyp otyr.
Sondaı-aq Nurjan Nurjigitov Jabaı ózenindegi jumystardyń barysymen tanysty. Búginde uzyndyǵy 7,3 shaqyrym bolatyn ýchaskede ózen arnasyn 120 metrge deıin keńeıtý jáne túbin 3 metrge deıin tereńdetý jumystary tolyq aıaqtalǵan. Aldaǵy ýaqytta ózen jaǵalaýlarynyń eńisterin tegisteý jáne jersorǵysh tehnıkanyń kómegimen ózen túbin qosymsha 1,5 metrge tereńdetý jumystary júrgiziledi. Joba Jabaı ózeniniń sý ótkizý qýatyn arttyrýǵa baǵyttalǵan. Nátıjesinde Aqmola oblysynda kóktemgi sý tasqyny kezeńiniń qaýipsiz ótýi qamtamasyz etiledi.
Buǵan deıin Shyǵys Qazaqstan oblysynda bıyl barlyq gıdrobeketterdi jasandy ıntellektini qoldana otyryp tolyq avtomattandyrylǵan rejımge kóshirý josparlanyp otyrǵanyn jazǵan edik.
