Soltústik Makedonııa Prezıdenti Qazaqstan Prezıdentiniń BUU júıesine qatysty usynysyn qoldady
ASTANA. KAZINFORM — Soltústik Makedonııa Prezıdenti Gordana Sılıanovska-Davkova Qazaqstan Prezıdentiniń BUU Jarǵysyn múltiksiz saqtaýǵa qatysty aıtqan pikirin qoldaıtynyn aıtty.
Onyń paıymynsha, BUU quramynan biraz eldiń shyǵýy qaýpi bar.
— Álemdik qaýipsizdik, klımattyń ózgerýi, tsıfrlyq transformatsııa, sondaı-aq teńsizdik jaǵdaıymen kúres máselelerine erekshe mán berý kerek. Jahandyq kúsh-jigerdi jumyldyrýdyń ornyna, biz keri qaraı jyljyp bara jatqan sııaqtymyz, ıaǵnı eski dúnıejúzilik tártipke túsip ketetin syńaılymyz. Qazir biz tártip pen erejeler ústem bolǵan kezeńnen bılik kúshi saltanat qurǵan deńgeıge aýysyp bara jatqanyn baıqap otyrmyz, — dedi Gordana Sılıanovska-Davkova Astana halyqaralyq forýmynda.
Osy oraıda ol Qazaqstan Prezıdenti Qasym-Jomart Toqaevtyń BUU júıesine qatysty pikirin qoldaıtynyn aıtty.
— Eýropalyq eldiń prezıdenti retinde shaǵyn memleketter orta derjavalarmen birge BUU-daǵy tıimdi mýltılateralızmdi qoldaýy tıis dep sanaımyn, ıaǵnı BUU osy protsestiń ortalyǵynda bolýy kerek. Ol úshin eleýli reforma qajet. BUU Qaýipsizdik Keńesiniń quramy keńeıtilip, osy reformalardan ótýi tıis, — dedi Soltústik Makedonııa Prezıdenti.
Onyń sózine qaraǵanda, BUU-nyń bas hatshysy laýazymyna áıel adamdy taǵaıyndaý ýaqyty jetti.
Budan buryn habarlanǵandaı, Astana halyqaralyq forýmynda Memleket basshysy Qasym-Jomart Toqaev álem elderi BUU Jarǵysyn múltiksiz saqtaýy qajet ekenin atap ótti.
Prezıdenttiń paıymynsha, mıllıardtaǵan adamnyń taǵdyryna áser etetin asa mańyzdy sheshimdi birneshe eldiń qabyldaǵany durys emes. Sondyqtan Qazaqstan BUU Qaýipsizdik Keńesiniń quramyn keńeıtip, oǵan álemniń ár óńirinen ókil qosý týraly ustanymdy qoldaıdy.
— Qazaqstan orta derjavalar ádiletti ári ınklıýzıvti álemdik tártiptiń ornaýyna múddeli bolýy kerek dep sanaıdy. Qazirgi júıeni muqııat saralap, tyń ádis-tásilderge súıený qajet. Soǵan sáıkes, orta derjavalar da jaýapkershilik júgin kóterýge daıyn bolýǵa tıis, — dedi Qasym-Jomart Toqaev.