Soltústik Koreıanyń 20 teńizshisi Qytaı aýmaǵynda keme apatynan qaza tapqan

ASTANA. KAZINFORM — Qytaı kemesimen soqtyǵysqan Soltústik Koreıaniń júk kemesi sýǵa batyp, 20-ǵa jýyq teńizshi qaza tapqan. Bul týraly Liahe Zaobao basylymy habarlady.

Belgili bolǵandaı, keme apaty Koreı túbeginiń batysyndaǵy teńiz aıdynynda tirkelgen. Soltústik Koreıaǵa tıesili kómir tasýshy keme Qytaıdyń júk kemesimen soqtyǵysyp, sýǵa batyp ketken. Saldarynan 20-ǵa jýyq soltústikkoreıalyq teńizshi qaza tapqan. Alaıda, Qytaı men Soltústik Koreıa bıligi tıisti aqparatty jasyryp qalǵan.

Basylymnyń jazýynsha, aqpan aıynyń sońyna qaraı avtomattandyrylǵan sáıkestendirý júıesi (AIS) óshirilgen soltústikkoreıalyq júk kemesi Qytaı portynyń mańynda sýǵa batqan. Qytaıdyń tıisti uıymdary kómek kórsetkenimen, ekıpaj múshelerin aman alyp qalý múmkin bolmaǵan. Qytaı kemesine aýyr zaqym kelmegen.

Soltústik Koreıanyń kómir eksporttaýy BUU Qaýipsizdik Keńesiniń 2371-shi qararyna qaıshy. Aıtylýynsha, apat bolǵan teńiz aımaǵy zańsyz kómir tasymalyn uıymdastyratyn soltústikkoreıalyq júk kemeleri jıi paıdalanatyn baǵyt eken.

Belgili bolǵandaı, oqıǵa kezinde teńiz aıdynyn soqyr tuman basqan. Qytaı kemesi sanktsııadan jaltarý maqsatynda AIS júıesin óshirip tastaǵan júk kemesin der kezinde baıqamaı, búıirinen kılikken bolýy múmkin. Aıtylýynsha, keme bortyndaǵy kómir men ózge júk túgelimen teńizge batyp ketken.

Aqparat kóziniń aıtýynsha, apat týraly málimettiń jarııa bolýy Soltústik Koreıaǵa tıimsiz, Qytaı tarapy da BUU sanktsııasynyń buzylýyna kóz juma qaraǵany úshin halyqaralyq qoǵamdastyqtyń synyna ushyraýy múmkin. Osy sebepti eki tarap ta oqıǵa týraly aqparatty jasyryp qalýǵa tyrysqan bolýy yqtımal.

Buǵan deıin, 2017 jyldyń naýryz aıynda Qytaıdyń ońtústik-shyǵysyndaǵy Tszıansý provıntsııasy mańynda da Soltústik Koreıanyń júk kemesi Qytaı kemesimen soqtyǵysyp, sýǵa batqan bolatyn.