Soltústik Koreıada Ońtústik Koreıa kontentin kórgeni úshin ólim jazasy kóbeıgen
ASTANA. KAZINFORM – COVID-19 pandemııasy kezinde shekaralar jabylǵannan keıin Soltústik Koreıada túrli qylmystar, sonyń ishinde Ońtústik Koreıanyń mádenı kontentin kórgeni úshin oryndalǵan ólim jazalary kúrt artqan. Bul týraly seısenbi kúni jarııalanǵan esepte aıtyldy, dep habarlaıdy Yonhap agenttigi.
Seýlde ornalasqan «Ótpeli kezeń ádildigi jónindegi jumys toby» (TJWG) úkimettik emes uıymy jarııalaǵan baıandamada Soltústik Koreıa basshysy Kım Chen Yn bılikke kelgen 2011 jyldan 2024 jylǵa deıingi 13 jyl ishindegi ólim jazalary men úkimderi taldanǵan.
Osy kezeńde rastalǵan 144 ólim jazasynyń 65-i Soltústik Koreıa COVID-19 pandemııasynyń basynda shekarasyn japqannan keıin taǵaıyndalǵan.
Zertteý 265 soltústikkoreıalyq bosqynnyń kýáligine jáne el ishindegi derekkózder arqyly aqparat taratatyn bes BAQ-tyń materıaldaryna negizdelgen.
Esepke sáıkes, 2015–2019 jyldary BUU komıssııasynyń Soltústik Koreıadaǵy adam quqyqtarynyń buzylýyn tergeýinen keıin halyqaralyq qaýymdastyqtyń nazary kúsheıip, ólim jazalarynyń sany azaıǵan.
Alaıda 2020 jyly pandemııaǵa baılanysty shekara jabylǵan soń bul kórsetkish qaıtadan kúrt ósken. Keıingi bes jylda ólim jazalary men ólim úkimderiniń sany 116,7 paıyzǵa, al zardap shekkender sany 247,7 paıyzǵa artqan.
Ásirese koreı doramalary, fılmder, K-pop jáne dinı rásimderge qatysty ister boıynsha jazalar aıtarlyqtaı kóbeıgen. Esepte Ońtústik Koreıanyń mádenı kontentine baılanysty ólim jazalary shekara jabylǵannan keıin 250 paıyzǵa óskeni kórsetilgen.
Baıandamada Phenıan 2020 jáne 2023 jyldary tıisti zańdardy qabyldaý arqyly mundaı repressııalarǵa quqyqtyq negiz qalyptastyrǵany atap ótilgen.
Sondaı-aq 46 ólim jazasyn oryndaý orny anyqtalǵan. Onyń beseýi bıleýshi Koreıa Eńbek partııasynyń shtab-páterinen 10 shaqyrym radıýsta ornalasqan. Sol jerde Kım Chen Ynnyń keńsesi bar dep esepteledi.
– Bılik tórtinshi muragerlik bılik aýysýyna umtylyp otyrǵandyqtan, mádenı jáne ıdeologııalyq baqylaýdy kúsheıtý, saıası ústemdikti saqtaý úshin ólim jazalarynyń sany artýy múmkin, – delingen baıandamada.
Eske sala ketsek, byltyr Iranda bir jyl ishinde ólim jazasynyń sany eki esege artqanyn jazdyq.
Al bıyl Úndistanda toǵyz polıtseı ólim jazasyna kesildi.
