Soltústik Koreıa jasandy ıntellekti bar torpedany sátti synaqtan ótkizgenin málimdedi
ASTANA. KAZINFORM — Soltústik Koreıa nysandardy anyqtap, olarǵa dál baǵyttalý úshin jasandy ıntellektini qoldanatyn jańa torpedalyq júıeni sátti synaqtan ótkizgenin málimdedi. Bul týraly Kazinform agenttigi Associated Press basylymyna silteme jasap habarlady.
Koreıanyń Ortalyq telegraf agenttiginiń málimetinshe, synaq 15 qazanda ótken. Jańa júıe Zam-2.0 dep atalady. Soltústik Koreıa ony nysanaǵa dál baǵyttalatyn joǵary jyldamdyqty torpeda retinde sıpattady.
Alaıda agenttik qarý júıesiniń jumysynda jasandy ıntellektiniń qalaı qoldanylatynyn naqtylamady.
Habarlamada keıingi bes jylda ótkizilgen 180-nen astam synaqtyń nátıjesinde ázirlengen torpedanyń qozǵaltqysh júıeleriniń jumys qabileti rastalǵany aıtylǵan.
Ońtústik Koreıanyń áskerı vedomstvosy Phenıannyń málimdemesine ázirshe túsinik bergen joq. Buǵan deıin Seýl Soltústik Koreıany áskerı tehnologııalarynyń múmkindikterin asyra kórsetýge birneshe ret aıyptaǵan.
Keıingi aptalarda Soltústik Koreıa qarý-jaraq synaqtaryn jıiletip, áskerı-teńiz kúshterin damytýǵa erekshe nazar aýdaryp otyr. Atap aıtqanda, 14 qazanda Phenıan úsh jylǵa jýyq ýaqyttan keıin alǵash ret sýasty qaıyǵynan ushyrylatyn zymyrandardy synaqtan ótkizdi.
Budan bólek, 20 qyrkúıek pen 3 qazanda KHDR ártúrli qashyqtyqqa arnalǵan gıperdybystyq zymyran júıelerin synady. Soltústik Koreıa basshysy Kım Chen Ynnyń ápkesi Kım E Chjon 3 qazanda synalǵan zymyrandarda da jasandy ıntellekt tehnologııalary qoldanylǵanyn málimdedi.
Degenmen keıbir sarapshylar Soltústik Koreıa qarý-jaraǵynda nysandardy anyqtap, óz betinshe tańdaıtyn ozyq júıeler bar ekenine kúmán keltiredi. Olardyń baǵalaýynsha, KHDR zymyrandardy baǵyttaý baǵdarlamalaryn jetildirip jatqan bolýy múmkin, biraq jasandy ıntellektiniń málimdelgen múmkindikteri ázirge táýelsiz derekkózder arqyly rastalmaǵan.
Eske salaıyq, Soltústik Koreıa 2026 jylǵy 20 qyrkúıekte Japon teńizi baǵytyna birneshe snarıad ushyrǵanyn habarlaǵan edi. Olardyń birin Ońtústik Koreıa áskerıleri qysqa qashyqtyqqa ushatyn ballıstıkalyq zymyran dep baǵalady
