Soltústik Koreıa Japon teńizine qaraı ballıstıkalyq zymyran ushyrǵanyn rastady
ASTANA. KAZINFORM – Soltústik Koreıa 31 qazan, beısenbi kúni Japon (Shyǵys) teńizine qaraı qurlyqaralyq ballıstıkalyq zymyran ushyrǵanyn rastady, dep habarlaıdy Koreıa Ortalyq telegraf agenttigi.
Agenttiktiń habarlaýynsha, KHDR Qorǵanys mınıstrligi ókiliniń málimdemesine sáıkes 31 qazan kúni tańerteń qurlyqaralyq ballıstıkalyq zymyran synaǵyn ótkizdi.
«Búgin KHDR zymyran tehnıkasy bas basqarmasy óte mańyzdy synaq ótkizdi. KHDR basshysynyń buıryǵymen júzege asyrylǵan synaq ushyrý KHDR-nyń strategııalyq zymyrandyq áleýeti týraly sońǵy málimetterdi jańartyp, onyń álemdegi eń qýatty strategııalyq tejeý quralynyń zamanǵa saı jáne senim ekenin kórsetti», - dep jazdy agenttik.
«Synaq ushyrý – bul sońǵy ýaqytta aımaqtyq jaǵdaıdy qasaqana ýshyqtyrǵan jáne bizdiń respýblıkamyzdyń qaýipsizdigine qater tóndiretin qarsylastardy jaýap sharalaryn qabyldaýǵa bel baılaý týraly habardar etý maqsatyna tolyǵymen sáıkes keletin tıisti áskerı is-qımyl», - dep keltirdi agenttik Kım Chen Ynnyń sózderin.
«Men KHDR eshbir jaǵdaıda ıadrolyq qarýly kúshterin nyǵaıtý baǵytyn ózgertpeıtinine sendiremin», - dep qosty ol.
Óz kezeginde Ońtústik Koreıa qurlyqaralyq ballıstıkalyq zymyrandar ushyrýyna jaýap retinde Soltústik Koreıaǵa qarsy jańa sanktsııalar engizedi, dep jazdy Yonhap agenttigi prezıdent ákimshiligine silteme jasap.
