Soltústik Koreıa týrızm úshin shekarasyn taǵy japty

ASTANA. KAZINFORM – Batys týrıstik agenttikteri sheteldik týrıster budan bylaı Soltústik Koreıanyń Qytaımen shekaralas Rason qalasyna bara almaıtynyn málimdedi. Phenıannyń bes jyl oqshaýlanǵannan keıin shekarasyn týrızm úshin qaıta ashý týraly jýyrdaǵy sheshimi kenetten joıyldy, dep habarlaıdy VVS. 

KHDR Covid-19 vırýsynyń taralýyn boldyrmaý úshin 2020 jyldyń basynda shekaralaryn japty, sodan keıin Qytaıdan azamattarynyń zańsyz kirýine jol bermeý úshin soltústik shekarasy boıyndaǵy qorǵanysty kúsheıtti. 

Sodan beri Soltústik Koreıa Reseı men Qytaıdyń qoldaýyna súıenip, álem elderiniń kóp bóliginen oqshaýlanyp qaldy.

Aqpan aıynda Batystyń birneshe týroperatorlary Soltústik Koreıa tarapynan ruqsat alǵannan keıin KHDR soltústik-shyǵysyndaǵy Rason qalasyna saıahatshylardyń azdaǵan sanyn jibergenin habarlady. 

Biraq sársenbide keıbir týrıstik kompanııalar bul saparlar túsiniksiz sebeptermen toqtatylǵanyn málimdedi.

— Seriktester bizge Rasonǵa týrlar toqtatylǵanyn habarlady, — delingen Young Pioneer Tours týrıstik agenttiginiń saıtyndaǵy habarlamada. 

Koryo Tours týrıstik agenttigi «Rason ýaqytsha jabylǵanyn», al onyń Beıjińde ornalasqan bas menedjeri Saımon Kokerell AFP agenttigine Soltústik Koreıadaǵy týrıster «saparyn josparlanǵandaı aıaqtaıtynyn» aıtty.

Ispanııanyń KTG týrıstik agenttiginiń týrlar úılestirýshisi Raıko Vega da AFP agenttigine KHDR-ǵa týrlardyń toqtatylǵanyn rastap: «Biz onyń sebebin jáne onyń qansha ýaqytqa sozylatynyn bilmeımiz», — dep qosty.

Soltústik Koreıa birneshe halyqaralyq saýda jáne resmı delegatsııalardy qabyldady, al ótken jyly pandemııadan keıin alǵash ret reseılik týrısterge elge kirýge ruqsat berdi.
Qytaı jáne Reseı shekaralaryna jaqyn ornalasqan Rason 1991 jyly Soltústik Koreıanyń óziniń vızalyq rejımi bar alǵashqy arnaıy ekonomıkalyq aımaǵy boldy.

Buǵan deıin Ońtústik Koreıa joǵary tehnologııa mamandaryna «joǵary deńgeıli vıza» engizetinin jazǵan bolatynbyz.