Soltústik Koreıa taǵy da jańa zymyran ushyrdy
ASTANA. KAZINFORM — Ońtústik Koreıanyń Birikken shtab bastyqtary komıtetiniń málimeti boıynsha, Soltústik Koreıa sársenbide Japon teńizine qaraı birneshe zymyran ushyrdy. Bul shamamen on qysqa qashyqtyqqa ushatyn ballıstıkalyq zymyran ushyrylǵannan keıin birneshe kún ótken soń boldy. Bul týraly Yonhap habarlady.
— Bizdiń qarýly kúshterimiz Ońtústik Koreıa men AQSh birlesken qorǵanys strategııasynyń aıasynda Soltústik Koreıanyń ár qozǵalysyn jiti baqylap otyr jáne kez kelgen arandatýshylyqqa batyl jaýap berýge daıyn jáne oǵan tolyq múmkindigi bar, — delingen Birikken shtab bastyqtary komıtetiniń habarlamasynda.
Birikken komıtet qazirgi ýaqytta ushyrylǵan zymyrandar jaıly málimetter egjeı-tegjeıli taldanyp jatqanyn, biraq Soltústik Koreıanyń bir ýaqytta birneshe túrli zymyran ushyrýy múmkindigin eskeretinin málimdedi.
Ótken aptada Soltústik Koreıa Japon teńizine qaraı qysqa qashyqtyqqa ushatyn onǵa jýyq ballıstıkalyq zymyran ushyrǵan edi.
Soltústik Koreıanyń memlekettik BAQ-tary Phenıan senbi kúni taktıkalyq ballıstıkalyq zymyrandarǵa ornatýǵa bolatyn kassetalyq bombany da synaqtan ótkizgenin habarlaǵan. Ońtústik Koreıa áskerıleri bul synaq týraly eshqandaı aqparat jarııalamady.
Bul oqıǵalar Ońtústik Koreıa Soltústik Koreıaǵa shekarany demarkatsııalaý boıynsha kelispeýshilikterdi sheshý úshin áskerı kelissóz júrgizýdi usynǵannan keıin bolyp otyr. 21 qyrkúıekte shekaradaǵy mına jarylyp, Ońtústik Koreıanyń úsh áskerı qyzmetshisi jaraqat alǵan soń, eki el arasyndaǵy shıelenis ýshyǵa túsken.
Ońtústik Koreıa tarapy Soltústik Koreıanyń áskerı-demarkatsııa syzyǵyn buzýy múmkin degen ýchaskeni tekserip jatqan kezde mına jarylǵan. Phenıan buǵan deıin shekara qorǵanysyn kúsheıtip, tosqaýyldar salǵan jáne mınalar qoıǵan bolatyn.
Soltústik Koreıa oqıǵaǵa qatysy baryn joqqa shyǵardy. Phenıan Seýldi jaýapkershilikti Soltústik Koreıa basshylyǵyna aýdarýǵa tyrysty dep aıyptady jáne qarý qoldanamyz, shekara boıyndaǵy daýys zoraıtqyshtar arqyly Ońtústik Koreıaǵa qarsy úgit-nasıhat habarlamalaryn taratýdy qaıta bastaımyz dep ses kórsetken.
Buǵan deıin Kım Chen Yn KHDR áskerin soǵysqa tolyq daıyn bolýǵa shaqyrǵan.
