Soltústik Koreıa Ońtústik Koreıaǵa nájis zattar toltyrylǵan sharlardy ushyrdy

ASTANA. KAZINFORM - Yonhap aqparat agenttiginiń habarlaýynsha, Ońtústik Koreıanyń Birikken shtaby Soltústik Koreıanyń Ońtústik Koreıaǵa qaraı nájis pen qoqys toltyrylǵan kóp mólsherdegi sharlardy jibere bastaǵanyn málimdedi.

Osy ýaqytqa deıin Ońtústik Koreıanyń kóptegen aımaǵynda Soltústik Koreıadan ushyrǵan 150 áýe shary tabyldy. Sharlardyń keıbiri qondy, al basqalary áli de aýada qalqyp tur. Sharlarmen tasymaldanatyn zattardyń barlyǵy qoqys pen nájis ekeni rastaldy.

Bul sharlardy jınaý jáne taldaý jumystaryn júrgizýge Ońtústik Koreıa áskerıleriniń bıohımııalyq shabýyldardyń aldyn alý jónindegi «CRRT» departamenti men jarylǵysh oq-dárilerdiń aldyn alý jónindegi «EOD» departamenti bólimshelerdiń jeke quramy jumyldyryldy.

Ońtústik Koreıa Soltústik Koreıany halyqaralyq quqyqty buzdy jáne Ońtústik Koreıa azamattarynyń qaýipsizdigine eleýli qater tóndirdi dep aıyptap jatyr.

Ońtústik Koreıa áskerıleri qazirgi jaǵdaıdy sheshý úshin Birikken Ulttar Uıymynyń qolbasshylyǵymen birlesip jumys atqaratynyn málimdedi jáne azamattarǵa Soltústik Koreıanyń áýe sharlaryn baıqaǵan jaǵdaıda dereý polıtsııaǵa habarlasý kerektigin eskertti.

Yonhap agenttiginiń habarlaýynsha, Soltústik Koreıanyń resmı aqparat quraldary 26-sy kúni Ońtústik Koreıanyń keıbir azamattyq qoǵamdarynyń Soltústik Koreıaǵa úgit-nasıhat paraqshalaryn tastaýyna baılanysty jaýap retinde áreket jasaıtynyn habarlaǵan.

Soltústik Koreıa 2016 jyly da Ońtústik Koreıaǵa qoqys tasymaldaıtyn sharlar jibergen eken.