Soltústik Koreıa onǵa jýyq ballıstıkalyq zymyran ushyrdy
ASTANA. KAZINFORM — Ońtústik Koreıa Qarýly Kúshteriniń Birikken shtab bastyqtary komıteti Soltústik Koreıanyń Japon teńizine qaraı shamamen on qysqa qashyqtyqqa ushatyn ballıstıkalyq zymyran ushyrǵanyn málimdedi, dep habarlaıdy Yonhap agenttigi.
Zymyrandar Soltústik Koreıanyń shyǵys jaǵalaýyndaǵy Vonsan aýdanynan saǵat 12:30 shamasynda áýege kóterilip, shamamen 250 shaqyrym ushqan.
Qazirgi ýaqytta Ońtústik Koreıa AQSh-pen birge zymyrandardyń tehnıkalyq sıpattamalaryna taldaý júrgizip jatyr.
— Ońtústik Koreıa men AQSh birlesken qorǵanys ustanymyna súıene, bizdiń áskerı kúshterimiz kez kelgen arandatýshylyqqa batyl jaýap berý múmkindigi men daıyndyǵyn saqtaı otyryp, Soltústik Koreıanyń túrli áreketterin muqııat baqylap otyr, — delingen Birikken shtab bastyqtary komıtetiniń málimdemesinde.
Bul oqıǵa Ońtústik Koreıa Soltústik Koreıaǵa shekarany demarkatsııalaý boıynsha kelispeýshilikterdi sheshý úshin áskerı kelissóz júrgizýdi usynǵannan bir aptadan keıin bolyp otyr. 21 qyrkúıekte shekaradaǵy mına jarylyp, Ońtústik Koreıanyń úsh áskerı qyzmetshisi jaraqat alǵan soń, eki el arasyndaǵy shıelenis ýshyǵa túsken.
Ońtústik Koreıa tarapy Soltústik Koreıanyń áskerı-demarkatsııa syzyǵyn buzýy múmkin degen ýchaskeni tekserip jatqan kezde mına jarylǵan. Phenıan buǵan deıin shekara qorǵanysyn kúsheıtip, tosqaýyldar salǵan jáne mınalar qoıǵan bolatyn.
Soltústik Koreıa oqıǵaǵa qatysy baryn joqqa shyǵardy. Phenıan Seýldi jaýapkershilikti Soltústik Koreıa basshylyǵyna aýdarýǵa tyrysty dep aıyptady jáne qarý qoldanamyz, shekara boıyndaǵy daýys zoraıtqyshtar arqyly Ońtústik Koreıaǵa qarsy úgit-nasıhat habarlamalaryn taratýdy qaıta bastaımyz dep ses kórsetken.
Buǵan deıin KHDR sý astynan ushyrylatyn eki jańa zymyranyn synaqtan ótkizgen edi.
Soltústik Koreıa jasandy ıntellekti bar torpedany sátti synaqtan ótkizgenin málimdedi.
