Soltústik Koreıa birneshe ballıstıkalyq zymyran ushyrdy

ASTANA. KAZINFORM — Soltústik Koreıa beısenbi kúni Japon teńizine qaraı qysqa qashyqtyqtaǵy birneshe ballıstıkalyq zymyran ushyrdy, dep habarlaıdy Yonhap. 

Bul Soltústik Koreıanyń naýryz aıynan beri ballıstıkalyq zymyrandy alǵash ret ushyrýy boldy.

Shtab bastyqtary birikken komıtetiniń (JCS) málimdeýinshe, Soltústik Koreıanyń shyǵysyndaǵy Vonsan qalasynan qysqa qashyqtyqqa ushatyn birneshe ballıstıkalyq zymyrannyń ushyrylǵany jergilikti ýaqyt boıynsha tańǵy saǵat 8:10 men 9:20 aralyǵynda tirkelgen. 

Komıtet málimetinshe, zymyrandardyń biri Japon teńizine qulaǵanǵa deıin 800 shaqyrymdaı ushyp ótken. Qazirgi ýaqytta qosymsha taldaý júrgizilip jatyr jáne tıisti aqparat AQSh pen Japonııaǵa jedel túrde jiberildi. 

— Ońtústik Koreıa men AQSh-tyń birlesken qorǵanys ustanymy aıasynda bizdiń áskerıler Soltústik Koreıanyń ártúrli áreketterin muqııat qadaǵalap, Soltústik Koreıanyń qate sheshimder qabyldaýyna jol bermeý úshin kez kelgen arandatýshylyqqa jaýap berýge ázirligi men asqan qabiletin saqtap otyr, — delingen málimdemede.

Eske sala ketsek, 10 naýryzda Ońtústik Koreıa men AQSh birlesken oqý-jattyǵýlarynyń bastalýy aıasynda Soltústik Koreıa Sary teńizge qaraı ballıstıkalyq zymyran ushyrdy.