Soltústik Koreıa bıyl alǵashqy zymyranyn ushyrdy

ASTANA. KAZINFORM – KHDR Japon teńizine qaraı (boljam boıynsha) ballıstıkalyq zymyran ushyrdy. Bul týraly Japonııanyń jaǵalaý kúzeti habarlady, dep jazdy TASS aqparat agenttigi.

Japon qoǵamdyq telearnasynyń habarlaýynsha, zymyran Japonııanyń Japon teńizindegi erekshe ekonomıkalyq aımaǵynan tys jerge qulaǵan. Qandaı da bir shyǵyn týraly aqparat túsken joq. Japondyq baqylaýshylar aımaqtaǵy kemelerdi zymyran qaldyqtaryn baıqasa, olarǵa jaqyndamaı, dereý bılikke habarlasýǵa shaqyrdy.

Japon premer-mınıstri Sıgerý Isıbanyń keńsesinde Phenıannyń zymyran ushyrýy týraly aqparatty jınaý jáne taldaý úshin daǵdarysqa qarsy shtab jumys isteı bastady. Isıba sondaı-aq tıisti mınıstrlikter men vedomstvolarǵa jergilikti halyqty jaǵdaı týraly jedel aqparatpen qamtamasyz etip, aımaqtaǵy keme qatynasy men azamattyq avıatsııanyń qaýipsizdigin qamtamasyz etýdi tapsyrdy.

Bul Soltústik Koreıanyń 2025 jyly alǵashqy zymyran ushyrýy boldy. Sońǵy ret Phenıan zymyrandy ótken jyldyń 5 qarashasynda ushyrǵan.

Osyǵan deıin Soltústik Koreıanyń 31 qazan, beısenbi kúni Japon (Shyǵys) teńizine qaraı qurlyqaralyq ballıstıkalyq zymyran ushyrǵanyn rastaǵany týraly jazdyq.