Soltústik Koreıa basshysy AQSh-pen dıalog júrgizý shartyn qoıdy

ASTANA. KAZINFORM —  Kım Chen Yn eger Vashıngton ıadrolyq qarýsyzdandyrý týraly talaptarynan bas tartsa, AQSh-pen kelissóz júrgizýge daıyn, dep habarlaıdy VVS. 

Koreıanyń ortalyq telegraf agenttiginiń habarlaýynsha, Soltústik Koreıa basshysy bul týraly ótken demalys kúnderi parlament otyrysynda sóılegen sózinde aıtty.

— Eger AQSh ıadrolyq qarýsyzdandyrýǵa degen bos qumarlyǵynan bas tartsa jáne shyndyqty moıyndaı otyryp, Soltústik Koreıamen beıbit qatar ómir súrýge umtylýǵa daıyn bolsa, AQSh-pen kelissóz ústeline otyrmaýǵa eshqandaı sebep bolmaıdy, — dep keltirdi Yonhap agenttigi Soltústik Koreıa kóshbasshysynyń sózin.

Amerıka basshysymen sońǵy ret 2019 jyly kezdesken Kım bylaı dep qosty:

— Meniń prezıdent Tramp týraly jaqsy estelikterim bar. 

Ońtústik Koreıamen qarym-qatynas týraly aıta kele, Soltústik Koreıa basshysy Seýlmen kelissóz ústeline eshqashan otyrmaıtynyn jáne Phenıan ońtústikpen birigýge umtylmaıtynyn málimdedi.

Buǵan deıin Ońtústik Koreıa, AQSh jáne Japonııa úshjaqty áskerı jattyǵýdy bastaǵanyn jazǵan bolatynbyz.

Bes kúndik Freedom Edge jattyǵýlary 15-19 qyrkúıek aralyǵynda Ońtústik Koreıanyń Chedjý aralynyń shyǵysy men ońtústigindegi halyqaralyq sý aıdyndarynda ótedi.