Soltústik Kıprde jaraqat alǵan boıjetken Qazaqstan azamaty emes – QR SІM
ASTANA. KAZINFORM – Soltústik Kıprde pyshaq jaraqatyn alyp, aýrýhanaǵa túsken 22 jastaǵy boıjetkenniń Qazaqstan azamaty emestigi anyqtaldy. QR Syrtqy ister mınıstrliginiń málimetinshe, zardap shekken qyz Qazaqstanda týǵanymen, Qyrǵyz Respýblıkasynyń azamattyǵyn alǵan.
– Qazaqstan Respýblıkasy Syrtqy ister mınıstrligi Soltústik Kıprde bolǵan oqıǵada zardap shekken azamatqa qatysty kelesini habarlaıdy. Málimetterdi naqtylaý barysynda zardap shekken azamattyń Qazaqstanda týǵany, alaıda onyń Qyrǵyz Respýblıkasynyń azamaty ekeni anyqtaldy, – dep jazylǵan QR Syrtqy ister mınıstrliginiń málimdemesinde.
Eske sala ketsek, Soltústik Kıprde 22 jastaǵy boıjetken pyshaq jaraqatyn alyp, aýrýhanaǵa jetkizildi. Aldyn ala málimet boıynsha, er adam belgisiz sebeppen áıeldi pyshaqtap óltirýge árekettengen. Shabýyldan keıin kúdikti ózine de qol salǵan.
Keıinirek, onyń jasandy tynys alý apparatyna qosylǵany jáne jaǵdaıy óte aýyr ekeni, tipti ómirine qaýip tónip turǵany habarlandy.
