Soltústik Kıpr turǵyndary jańa kóshbasshysyn tańdaıdy

ASTANA. KAZINFORM – Jeksenbi kúni moıyndalmaǵan Soltústik Kıpr Túrik Respýblıkasynyń turǵyndary jańa kóshbasshysyn jáne araldaǵy qaqtyǵysty retteý baǵytyn aıqyndaıdy, dep habarlaıdy TASS.

Araldyń soltústiginde Túrik Kıpr qaýymdastyǵy kóshbasshysynyń saılaýy 19 qazanda ótedi.

Prezıdent saılaýyna qazirgi túrik-kıpr basshysy Ersın Tatar, oppozıtsııa jetekshisi ári Respýblıkalyq túrik partııasynyń (RTP) tóraǵasy Týfan Erhıýrman, sondaı-aq Kıpr sotsıalıstik partııasynyń ókili Osman Zorba men taǵy bes táýelsiz kandıdat qatysady.

Resmı túrde segiz úmitker tirkelgenimen, basty tartys Tatar men Erhıýrman arasynda órbimek. Qoǵamdyq saýalnama nátıjeleri boıynsha, eki úmitker de saılaýshylardyń 40 paıyzdan astamynyń qoldaýyna ıe. Al qalǵan qatysýshylardyń kórsetkishi 1 paıyzdan tómen. Sondyqtan olardyń qaı kandıdatqa qosylatyny jalpy nátıjeǵa aıtarlyqtaı áser etpeıdi.

Saılaýda jeńiske jetý úshin birinshi týrda 50 paıyzdan astam daýys jınaý qajet. Bul kórsetkishke jetý yqtımaldyǵy tómen bolǵandyqtan, qajet bolsa, ekinshi týr 26 qazanda ótedi.

Túrik-kıprlikter kóshbasshysynyń aldaǵy bes jylǵa saılanýy Kıpr máselesin sheshýdiń bolashaǵyna tikeleı yqpal etedi. Negizgi eki úmitker bul másele boıynsha qarama-qarsy ustanymda.

Túrkııa prezıdenti Rejep Taııp Erdoǵannyń jáne Túrkııadan Kıprge qonys aýdarǵan otbasylardyń qoldaýyna ıe Ersın Tatar aralda eki bólek memleketti moıyndaý ıdeıasyn jaqtaıdy. Al Týfan Erhıýrman BUU Qaýipsizdik Keńesiniń qararlarynda kórsetilgendeı, eki qaýymdastyqtan turatyn federatsııa qurýdy usynady.

Tatar Kıprde eki bólek halyq – grek jáne túrik qaýymdary ómir súretinin atap ótse, Erhıýrman «ortaq Kıprdiń» ıdeıasyna súıenip, barlyq turǵyndardy «kıprlikter» dep ataıdy.

Eske sala ketsek, bıyl Qazaqstan Prezıdenti Qasym-Jomart Toqaev Grekııa men Kıprdegi jańa elshilerdi taǵaıyndaǵan bolatyn.