Soltústik Qazaqstannyń kreatıvti ındýstrııasy 4,9 mln teńgeniń ónimin ótkizdi
ASTANA. KAZINFORM — Creative Aimaq jobasy aıasynda Soltústik Qazaqstan oblysynyń kreatorlary 4,9 mln teńgeniń ónimin satty.
Astanadaǵy Qazaq Creative Hub alańynda respýblıkalyq Creative Aimaq jobasy aıasynda Soltústik Qazaqstan oblysynyń «Botaı – Uly dala mádenıeti» atty kórme-jármeńkesi ótti. Ekspozıtsııany QR Premer-mınıstriniń orynbasary – Mádenıet jáne aqparat mınıstri Aıda Balaeva aralap kórdi.
Qatysýshylardy quttyqtaǵan Aıda Balaeva Creative Aimaq jobasynyń basty maqsaty óńirlik kreatorlardy ilgeriletý, olardyń ónimderi men qyzmetterin naryqqa shyǵarýǵa qoldaý kórsetý ekenin atap ótti.
Kórme-jármeńkede Soltústik Qazaqstan oblysynyń kreatorlary óńirdiń tarıhı-mádenı murasyn, aımaqtyq brendterin, zamanaýı tehnologııalyq ázirlemelerin jáne ınklıýzıvti jobalaryn tanystyrdy. Atap aıtqanda, qonaqtarǵa Botaı mádenıetine arnalǵan ınteraktıvti ekspozıtsııa, halyq sheberleriniń buıymdary, avtorlyq keramıka, ulttyq naqyshtaǵy dızaınerlik kıim toptamalary men kádesyı ónimderi usynyldy.
Sondaı-aq is-sharada «Tsıfrlyq kıiz úı» aımaǵy tanystyrylyp, onda jasandy ıntellekt, robototehnıka, GameDev, VR/AR, 3D-basyp shyǵarý jáne ózge de tsıfrlyq tehnologııalar salasyndaǵy jobalar kórsetildi.
Sonymen qatar Soltústik Qazaqstan oblysynyń avtorlary túsirgen derekti, anımatsııalyq jáne qysqametrajdy fılmder kórermen nazaryna usynyldy.
Kórme-jármeńke aıasynda dızaınerler Aıjan Kolchına men Sabına Volskaıanyń balalarǵa jáne eresekterge arnalǵan etnıkalyq kıim toptamalarynyń kórsetilimi ótti. Kreatorlar Parıjdegi joǵary sán aptalyǵy aıasynda uıymdastyrylatyn álemge tanymal Oriental Fashion Show jobasyna qatysqan. Al Sabına Volskaıa halyqaralyq baılanystardy damytýǵa qosqan úlesi úshin ıÝNESKO-nyń halyqaralyq nagradasymen marapattalǵan.
Sonymen birge kelýshiler qolóner sheberleriniń master-klastaryna qatysyp, kórmege qoıylǵan ónimderdi satyp alý múmkindigine ıe boldy. Eki kúnniń qorytyndysy boıynsha jalpy somasy 4,9 mln teńgege kreatıvti ındýstrııa ónimderi satyldy.
Creative Aimaq jobasyn Mádenıet jáne aqparat mınıstrliginiń qoldaýymen «Kreatıvti ındýstrııalardy damytý qory» korporatıvtik qory júzege asyryp keledi. Joba otandyq brendterdi qoldaýǵa, óńirlerdegi kreatıvti ındýstrııalardy damytýǵa jáne Qazaqstan aımaqtarynyń mádenı áleýetin keńinen tanytýǵa baǵyttalǵan.
Buǵan deıin atalǵan alańda Aqmola jáne Pavlodar oblystarynyń kreatıvti jobalary usynylǵan bolatyn. Jyl sońyna deıin Creative Aimaq jobasyna Qazaqstannyń barlyq óńiri qatysady.
