Soltústik Qazaqstannan Sıanǵa astyq tasymaldaý arnasy ashyldy — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstan órik jemisin eksporttaý boıynsha álemde ekinshi orynda — ÓzA
Ózbekstan órik ósirý jáne ony eksporttaý kólemi boıynsha álemde ekinshi orynda tur. Sonymen qatar, el shabdaly, shıe jáne júzim jemisin ósirý men eksporttaýda da jetekshi óńirler qatarynda atalyp otyr.
Bul týraly osy aptada «ÓzA» basylymy Agroónerkásip damytý agenttigine silteme jasap habarlady.
Habarlamada aıtylǵandaı, Ózbekstan órik ósirý jáne eksporttaý jóninen álemdik reıtıngte Túrkııadan keıingi ekinshi orynda, sondaı-aq shabdaly óndirýde de negizgi ortalyqtardyń biri sanalady.
Málimetke sáıkes, 2024–2025 jyldary respýblıka boıynsha jalpy aýdany 43,2 myń gektardy quraıtyn ındýstrııalyq-ıntensıvti jemis baýlary men júzim alqaptary salynyp jatyr.
Agenttik málimetinde bıylǵy jyldyń alǵashqy 9 aıynda 1,6 mıllıon tonna jemis-jıdek ónimderi 1,5 mlrd dollar quny kóleminde 70-ten astam memleketke eksporttalǵan.
Atap aıtqanda, jahandyq reıtıngter boıynsha Ózbekstannyń kórsetkishteri órik óndirý boıynsha — Túrkııadan keıin álemde 2-oryn; órik eksporttaý boıynsha — Italııadan keıin 2-oryn; shıe, júzim jáne shabdaly eksporttaý boıynsha da jetekshi memleketterdiń biri.
Aýǵanstanda 500 BAQ jumys isteıdi — «Eurasia Today»
Talıbannyń Aqparat jáne mádenıet mınıstrliginiń ókili Habıb Ǵafran Dúnıejúzilik teledıdar kúnine oraı joldaǵan habarlamasynda 500 BAQ-tyń ishinde ondaǵan teleaqparat quralynyń da bar ekenin aıtty, dep habarlaıdy «Eurasia Today» aqparat agentti.
Talıbannyń Aqparat jáne mádenıet mınıstrliginiń ókili bul top Aýǵanstandy baqylaýǵa alǵannan keıin 180 aqparat quraly men aqparat quraldaryn qoldaıtyn mekemelerge jumys isteýge lıtsenzııa bergenin málim etti.
«Eurasia Today» aqparat agenttiniń dereginshe, bul málimdeme Talıban Aýǵanstandy baqylaýǵa alǵannan keıin eldegi BAQ-ty qatty basyp-janyshtap, sóz bostandyǵyn shekteýde degen jaǵdaıǵa oraı jasaldy.
Talıban úkimeti sonymen qatar tikeleı efırdegi beınelerdi jarııalaýǵa tyıym salý arqyly Aýǵanstannyń 21 provıntsııasynda teleaqparat quralynyń jumysyn toqtatty.
Aıta keteıik, Dúnıejúzilik teledıdar kúni — Birikken Ulttar Uıymynyń Bas Assambleıasynyń usynysy boıynsha 1997 jyldan bastap jyl saıyn 21 qarashada atap ótiletin halyqaralyq kún.
Qazaqstandyq bıdaıdyń Qytaıǵa sapary — «Halyq gazeti»
Sıan Aıtszıýı astyq-maı ónerkásibi toby Qytaı-Eýropa poıyzy arqyly Soltústik Qazaqstannan Sıanǵa astyq tasymaldaý arnasyn ashty.
Bul týraly osy aptada Qytaıdyń «Halyq gazeti» basylymy habarlady.
Atalǵan BAQ-tyń dereginshe, bul yntymaqtastyq modeli 2016 jyly bastalyp, alǵashqy 2000 tonna qazaqstandyq maı ónimderi arnaıy poıyzben Sıanǵa jetkizilgen bolatyn. Sodan keıin bıdaıdy turaqty tasymaldaý jolǵa qoıylǵan.
Sonymen qatar, joba «Aýyl sharýashylyǵyna tapsyrys berý» yntymaqtastyq modelin qoldandy. Sıan Aıtszıýı astyq-maı ónerkásibi toby Qytaı jáne Qazaqstan sarapshylarymen birlese otyryp, eginshilik tehnologııalary boıynsha nusqaýlyq beredi jáne bekitilgen baǵamen ónimdi satyp alýǵa kepildik beretin kelisimsharttar jasady. Qazirgi ýaqytta Soltústik Qazaqstanda úlken kólemde kooperatıvti egin sharýashylyǵy bazasy qurylyp, jergilikti aýylsharýashylyq óndirisiniń tehnologııasyn jetildirip otyr.
Sonymen qatar osy aptada «Halyq gazeti» basylymynda «Alashandaǵy túıeler qystaýǵa aıdaldy» degen taqyryptaǵy aqparat jarııalady.
Keltirilgen derekterge súıensek, jaqynda Іshki Mońǵuldyń Alashan óńiri túıelerdiń jyl saıynǵy qonys aýdarý mezgilin bastady. Badyn-Djaran, Ýlan-Býh jáne onyń aınalasyndaǵy shóldi jerdegi malshylar kólikter men mototsıklderine minip, shól dalanyń kindigine endi. Olar júzdegen shaqyrym jol júrip, túıelerdi jınap, jazǵy jaılaýy bolǵan shól dala qoınaýyndaǵy 2000-nan astam túıeni qystaýlaryna qaraı aıdady. Qysqy otarǵa kóshirý bir aıǵa sozylady.
Qytaılyq BAQ-tyń málimetinshe, eldegi qos órkeshti túıeler eń shoǵyrly ómir súretin óńir retinde Alashan túıe qorynda 169 000 tuıaq túıe bar. Bul eldegi jalpy qos órkeshti túıe sanynyń shamamen úshten birin quraıdy.
Arakchı: Kaspıı teńizi Iran úshin Parsy shyǵanaǵy sııaqty mańyzdy — ParsToday
Iran Syrtqy ister mınıstri Kaspıı jaǵalaýy elderimen kópjaqty qarym-qatynastardy keńeıtý jáne aımaqtyń ekonomıkalyq, energetıkalyq jáne týrıstik áleýetin paıdalaný Iran Islam Respýblıkasynyń syrtqy saıasatynyń negizgi basymdyqtarynyń biri ekenin málimdedi, dep habarlady ParsToday aqparat agenttigi.
Irandyq BAQ-tyń dereginshe, Iran Syrtqy ister mınıstri Seıed Abbas Arakchı Irannyń soltústigindegi Gılan oblysynyń ortalyǵy Rasht qalasynda ótken Kaspıı teńizi elderiniń oblys ákimderiniń alǵashqy kezdesýiniń ashylý saltanatynda Kaspıı basseınin Parsy shyǵanaǵy sııaqty mańyzdy dep sanady. Onyń aıtýynsha, bul aımaqta óte mańyzdy máseleler bar, al jaǵalaýdaǵy elder ózderiniń ortaq múddeleri men alańdaýshylyqtaryn túsine otyryp, kóptegen jyl boıy yntymaqtastyqtaryn bastady.
ParsToday IRNA-ǵa silteme jasap habarlaýynsha, Arakchı Irannyń syrtqy saıasatynda kórshilerge basymdyq berý kerektigin tilge tıek etken.
Onyń aıtýynsha, kórshilermen saıası, ekonomıkalyq, áleýmettik, mádenı jáne qaýipsizdik qatynastaryn keńeıtý boıynsha keń josparlar bar jáne dıplomatııa bul baǵytta belsendi jumys isteıdi.
Irannyń Syrtqy ister mınıstri Irannyń soltústik Gılan, Mazandaran jáne Gúlistan oblystarynyń dálizderine, tranzıttik baǵyttaryna jáne týrıstik áleýetine toqtalyp, bul aımaqtardyń Kaspıı teńizi elderi úshin de týrıstik baǵyttarǵa aınalatynyna úmit bildirdi.
Sonymen qatar osy aptada «ParsToday„-de „Iran men Qazaqstan arasyndaǵy tarıhı jáne mádenı qarym-qatynastar jańa almasýlardy damytýdyń negizi bolyp tabylady“ degen taqyryptaǵy aqparat jarııalandy.
Atalǵan BAQ-tyń málimetinshe, Irannyń soltústigindegi Mazandaran gýbernatory Iran men Qazaqstan arasyndaǵy tarıhı jáne mádenı qarym-qatynastardy jańa almasýlardy damytýdyń negizi dep sanady.
«ParsToday»-diń keltirgen derekterine súıensek, sársenbi kúni Rasht qalasynda ótken Kaspıı teńizi jaǵalaýyndaǵy oblystar ákimderi alǵashqy kezdesýi aıasynda Mazandaran gýbernatory Máhdı ıÝnesı Rostamı qazaqstandyq sheteldik delegatsııanyń basshysymen kezdesip, Mazandarannyń aýyl sharýashylyǵy, taý-ken ónerkásibi, týrızm jáne teńiz saýdasy salalaryndaǵy keń múmkindikterin túsindirdi.
Ol birlesken naryqtar, áýe kompanııalary jáne mamandandyrylǵan kórmeler qurý qajettiligin basa aıtty. Onyń pikirinshe, Iran men Qazaqstan arasyndaǵy tarıhı jáne mádenı qarym-qatynastar — jańa almasýlardy damytýdyń negizi sanalady.
Qazaqstan delegatsııasynyń basshysy kezdesýde ózi pikirin bildirdi.
Túrkııa prezıdenti Erdoǵan eskertý jasady — TRT
Túrkııa prezıdenti Erdoǵan tómendep jatqan týý kórsetkishi bolashaq úshin qaýipti ekenin jáne buǵan beı-jaı qaramaý kerektigin aıtty.
Túrkııa prezıdenti Rejep Taıyp Erdoǵan beısenbi kúni Ankarada ótken «Otbasy jáne mádenıet‑óner sımpozıýmynda» sóılep, otbasy ınstıtýtyna tónip turǵan qıyndyqtardy atap ótti.
Bul týraly osy aptada Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, otbasy ınstıtýtyna qatysty máselelerge nazar aýdaryp, Erdoǵan «Biz genderlik beıtaraptyq pen LGBTK qozǵalystaryna qarsy sharalar qabyldap jatyrmyz, eshqandaı jeńildikke nemese salǵyrttyqqa jol bermeımiz» degen.
Ol álemde ǵalamdyq kapıtalızm, mádenı ımperııashyldyq pen tsıfrlyq qorshaý kúsheıip jatqan kezeńde Túrkııanyń otbasyn saqtap qalýǵa bel býǵanyn basa aıtty.
Prezıdent sonymen qatar demografııalyq daǵdarys týraly eskertti.
— Biz qazir apatpen betpe‑bet kelip otyrmyz, — dedi ol.
Resmı derekter boıynsha eldegi jalpy týý kórsetkishi ótken jyly 1,48-ge tómendegen.