Soltústik Qazaqstanǵa shetelden 6 myńnan astam asyl tuqymdy mal ákelinedi
ASTANA. KAZINFORM – Soltústik Qazaqstan oblysy 2026–2030 jyldarǵa arnalǵan mal sharýashylyǵyn damytý jónindegi keshendi jospardy iske asyrý aıasynda sheteldik asyl tuqymdy mal basyn irikteýge kiristi, dep habarlaıdy QR Aýyl sharýashylyǵy mınıstrliginiń baspasóz qyzmeti.
Óńir aýyl sharýashylyǵy taýaryn óndirýshilerdiń óndiris kólemin ulǵaıtýǵa, mal tabynynyń genetıkalyq áleýetin jańartýǵa jáne salanyń ónimdiligin arttyrýǵa baǵyttalǵan naqty jobalardy qolǵa ala bastady.
Osy rette oblys ákiminiń birinshi orynbasary Marat Tasmaǵanbetov, Mal ósirýshiler odaǵynyń basshysy Dáýren Salyqov jáne aýyl sharýashylyǵy taýaryn óndirýshilerden qamtylǵan delegatsııa músheleri Avstralııanyń mal sharýashylyǵy kásiporyndaryn aralady.
Delegatsııa músheleri mal basyn qarap, aldyn ala irikteý júrgizdi. Maldyń asyl tuqymdyq jáne ónimdilik qasıetteri, tuqymdyq erekshelikteri, jasy, tirileı salmaǵy, densaýlyq jaǵdaıy, syrtqy bitimi, sondaı-aq bolashaq tabynnyń ónimdiligi men ósimtaldyq qasıetterin aıqyndaıtyn basqa da kórsetkishteri nazarǵa alyndy.
Sonymen qatar mal basynyń quny, veterınarııalyq talaptar, karantındik rásimder, logıstıka jáne jetkizý merzimderi boıynsha máseleler pysyqtaldy. Mundaı tásil aýyl sharýashylyǵy taýaryn óndirýshilerge maldy qoljetimdiligine qaraı ǵana emes, onyń sapasyn, genetıkalyq áleýetin jáne jobanyń ekonomıkalyq tıimdiligin eskere otyryp tańdaýǵa múmkindik beredi.
2026 jylǵy qyrkúıek–qazan aılarynda óńirge 2 myńnan astam iri qara jáne 4 myńnan astam usaq mal basyn ákelý josparlanyp otyr.
Aıta keteıik, osyndaı maqsatpen qyrkúıek aıynda Qostanaı oblysynyń delegatsııasy Irlandııaǵa saparlamaq.
Eske sala keteıik, 2026–2030 jyldarǵa arnalǵan mal sharýashylyǵyn damytý jónindegi keshendi jospar salany aýqymdy damytýǵa, ınvestıtsııa tartýǵa jáne jańa óndiristik jobalardy iske qosýdy kózdeıdi.
-Bul jolda sharýashylyqtardy keńeıtýge, asyl tuqymdy mal satyp alýǵa jáne zamanaýı óndiristik bazany qalyptastyrýǵa aýyl sharýashylyǵy taýaryn óndirýshilerge ınvestıtsııa salýǵa múmkindik beretin jeńildetilgen qarjylandyrý tetikteri mańyzdy ról atqarady,-delingen habarlamada.
Osyǵan deıin elde mal sharýashylyǵyn qarjylandyrý kólemi artatyny týraly aıtylǵan bolatyn.
