Polıtsııa Soltústik Qazaqstandaǵy eń apatty aımaqtardyń birin atady
ASTANA. KAZINFORM — SQO-da PD bastyǵy qaýipti jol ýchaskelerin tekserdi, dep habarlaıdy Polisia.kz.
Soltústik Qazaqstan oblysy polıtsııa departamentiniń bastyǵy, polıtsııa Aıdyn Qabduldınov Petropavl qalasynyń mańyndaǵy jol qaýipsizdigi jaǵdaıyn jeke ózi tekserip, polıtsııanyń keshendi kúshteriniń saptyq qaraýyn ótkizdi.
Saptyq qaraý barysynda Qabduldınov aýa raıynyń qolaısyzdyǵy jaǵdaıynda jol jáne qoǵamdyq qaýipsizdikti qamtamasyz etýge jeke quramnyń daıyndyǵyn tekserdi. Ol polıtseılerge jol qozǵalysyn barynsha baqylaýdy qamtamasyz etý, adamdardyń ómiri men densaýlyǵyna tónetin táýekelderdi tómendetý jóninde tapsyrma berdi. Nóser nemese kóktaıǵaq jaǵdaıynda avtokólik ıeleriniń qysqy shınalarǵa ýaqytyly kóshýine, jyldamdyq rejımin saqtaýyna, manevr jasaý erejelerin oryndaýyna jáne sharshaǵan kúıde kólik basqarýǵa jol bermeýge erekshe nazar aýdarý qajettigi aıtyldy.

Budan keıin Aıdyn Qabduldınov «Ońtústik» baqylaý-ótkizý pýnktindegi patrýldik polıtsııanyń jumysyn tekserdi. Munda ınspektorlar júrgizýshilermen profılaktıkalyq jáne túsindirý jumystaryn júrgizedi.
Sonymen qatar, ol «QazAvtoJol» AQ oblystyq fılıalynyń ókilderimen birge avtokólik qozǵalysy qarqyny joǵary aınalma jolynyń «Ońtústik» baqylaý pýnktinen Omby aınalma jolyna deıingi bóligin aralady. Bul ýchaske — oblys ortalyǵynyń eń apatty aımaqtarynyń biri. Bıyl Chelıabi — Novosibir avtojolynyń osy bóliginde eki ólimmen aıaqtalǵan jol-kólik oqıǵasy tirkeldi. Bireýi — qarsy betke shyǵý saldarynan bolǵan soqtyǵysý, ekinshisi — jaıaý júrginshini qaǵyp ketý. Bul eki apatta 6 adam qaza taýyp, 1 adam jaralandy.

Jalpy, jyl basynan beri SQO-da 532 jol-kólik oqıǵasy tirkeldi. Onda 47 adam qaza taýyp, 699 adam jaraqat aldy. Avtojoldaǵy qaýipsizdikke áser etetin negizgi faktorlardyń biri — mas kúıde kólik júrgizý. Sondaı-aq oblys joldarynda 1075 mas júrgizýshi ustaldy, olardyń 394-i buryn júrgizýshi kýáliginen aıyrylǵan.
Sonymen qatar 37 júrgizýshige qylmystyq is qozǵaldy. Jol qozǵalysy erejeleriniń óreskel buzýshylyqtarynyń aldyn alý, mas júrgizýshilerdi jáne buryn quqyǵynan aıyrylǵandardy anyqtaý — «Zań men Tártip» tujyrymdamasy aıasynda polıtsııa jumysynyń negizgi basymdyqtarynyń biri bolyp qala beredi.
Budan buryn SQO-da bıyl esirtki taratyp, satqan 132 adam ustalǵany anyqtaldy.