Soltústik Qazaqstanda taǵy bir aýyl ishimdikten bas tartty
PETROPAVL. KAZINFORM — Soltústik Qazaqstan oblysy Aqqaıyń aýdanyndaǵy Daıyndyq aýylynyń turǵyndary araq-sharaptan tolyǵymen bas tartty. Sońǵy eki jyldan beri eldi mekende birde-bir aýyr nemese urlyq, otbasylyq janjaldar tirkelmegen.
Zarına Aıýpova Daıyndyq aýylyna 5 jyl buryn otbasymen kóship kelgen.
«Bul aýylda araq múldem ishpeıdi, bos júrgen adam joq, barlyǵy jumys isteıdi, dúkende alkogol satpaıdy, barlyǵy óz sharýasymen aınalysady. Bizdiń aýyl tynysh», — deıdi aýyl turǵyny.
Bir kezderi quryp ketýdiń az-aq aldynda qalǵan aýyl qazir óńirdegi úlgili eldi mekenderdiń qatarynda. «Úzdik 30 aýyl» respýblıkalyq jobasynda úzdikter qatarynan kórindi. Jergilikti kásipker Birjan Shaımerdenov jumys oryndaryn quryp qana qoımaı, jumysshylaryna jańa baspana turǵyzyp jatyr. Sondaı-aq áleýmettik nysandardy da turǵyzdy. Alkogolden tolyq bas tartýdy da usynǵan osy kásipker.
«Biz munda jumys isteı bastaǵanda aýylda 28 úı ǵana boldy, qazir olardyń sany 80-nen asyp otyr. Halyq sany — 315 adam. Biz otbasylardy osynda kóshýge shaqyramyz, jumys ornyn usynamyz, óndiristi arttyramyz», — deıdi Birjan Shaımerdenov.
Jergiliki turǵyndardyń bos ýaqytyn tıimdi ótkizýine, sportpen shuǵyldanýyna jaǵdaı jasalǵan. Qazir aýyl mektebinde 97 oqýshy bilim alady. Túlekter aýylǵa qajetti mamandyqty meńgerip, qaıtyp kelip jatyr.
Daıyndyq aýyly qaraıtyn Lenın aýyldyq okrýgine tájirıbeli ýchaskelik polıtsııa ınspektory Ádı Muqjanov qyzmet kórsetedi.
Іshki ister organdarynda on jyldan astam tájirıbesi bar. Onyń aýyldaǵy búgingi mindeti — sońǵy ýaqytta jıi tirkeletin qylmys — ınternet-alaıaqtyqtyń aldyn alý.
Buǵan deıin SQO-da turǵyndardyń azaıýyna baılanysty 45 aýyldyń jabylatyndyǵyn jazǵan edik.
