Soltústik Qazaqstanda rekordtyq 6,5 mln tonna astyq jınaldy — ákim esebi

ASTANA. KAZINFORM — Bıyl respýblıka boıynsha astyqtyń tórtten bir bóligi Soltústik Qazaqstan oblysynda jınaldy. Aýyl sharýashylyǵynyń jalpy ónim kólemi 878,3 mlrd teńgege jetti. Bul týraly óńir ákimi Ǵaýez Nurmuhambetov eseptik brıfınginde habarlady.

El Prezıdenti jyl qorytyndysy boıynsha ekonomıkanyń ósimin keminde 6,5 paıyzǵa deıin qamtamasyz etýdi tapsyrǵan edi. Bıylǵy 10 aıda Soltústik Qazaqstan oblysynyń qysqa merzimdi ekonomıkalyq ındıkatorynyń ósimi 13% qurady. 

— Negizgi salalar oń dınamıka kórsetti. Aýyl sharýashylyǵynda 9,3%, ónerkásipte - 19,1%, qurylsta - 30,1%, turǵyn úıdi paıdalanýǵa berýde - 3,9%, ınvestıtsııalarda - 7,3% ósý bar, — dedi Ǵ. Nurmuhambetov elordada Ortalyq kommýnıkatsııalar qyzmetinde. 

Onyń aıtýynsha, SQO úshin aýyl sharýashylyǵy — ekonomıkanyń negizgi salasy sanalady. Agroónerkásiptik keshen jalpy óńirlik ónimniń tórtten bir bóligin quraıdy.

— Aýyl sharýashylyǵynyń jalpy ónim kólemi 878,3 mlrd teńgege jetti. Bul óńirge el kóshbasshylarynyń úshtigine kirýge jáne azyq-túlik qaýipsizdigine eleýli úles qosýǵa múmkindik beredi. Bizde qazaqstandyq astyqtyń ¼ bóligi, maıly daqyldar men súttiń 1/10 bóligi óndiriledi. Ósimdik sharýashylyǵynda joǵary nátıjelerge qol jetkizildi: 4,3 mln gektar alqap jınalyp, maıly daqyldar alqaby 1 mln gektarǵa deıin ósti. Bul eldegi eń jaqsy kórsetkish, — dedi oblys ákimi. 

Bıyl oblys boıynsha ortasha astyq túsimi gektaryna 21,4 tsentnerdi qurady, al jalpy ónimdilik rekordtyq 6,5 mln tonnaǵa jetti.

Keıbir sharýashylyqtar gektarynan 40-50 tsentnerden joǵary ónim aldy. Maıly daqyldar boıynsha tarıhı maksımým — 1,2 mln tonnaǵa qol jetkizildi.

Osyǵan deıin Soltústik Qazaqstan oblysynda janarmaı qory eki aılyq normadan asatyny týraly jazdyq.