Soltústik Qazaqstanda quny 5 mlrd teńgelik jońyshqa zaýyty salynyp jatyr
ASTANA. KAZINFORM — Soltústik Qazaqstan oblysynda jylyna 60 myń tonna jońyshqa óńdeıtin zaýyt iske qosylady, dep habarlaıdy QR AShM baspasóz qyzmeti.
Soltústik Qazaqstan oblysynda quny 5 mlrd teńge boaltyn jońyshqa óńdeý zaýytynyń qurylys jumysy qarqyndy jalǵasyp jatyr. Investıtsııalyq jobany «SalarFarm» seriktestigi júzege asyrady.
Joba Soltústik Qazaqstan oblysy tájirıbesin taratý baǵdarlamasy aıasynda qolǵa alynǵan jáne eń qundy kópjyldyq mal azyqtyq daqyldardyń biri sanalatyn jońyshqany tereń óńdeýdi kózdeıdi.
— Jońyshqa aqýyzǵa baı ári amınqyshqyldyq quramy teńgerimdi daqyl retinde erekshelenedi. Túıirshiktelgen ónim uzaq ýaqyt saqtaýǵa jáne aýyl sharýashylyǵy janýarlarynyń azyq ratsıonynda tıimdi paıdalanýǵa bolady. Kásiporyn jobalyq qýatyna shyqqannan keıin jylyna 60 myń tonnaǵa deıin joǵary sapaly túıirshiktelgen jońyshqa óndire alady. Ónimniń negizgi bóligi ishki naryqqa jetkizilip, sondaı-aq Qytaı men Ortalyq Azııa elderine eksporttalmaq, — delingen mınıstrlik taratqan aqparatta.
Qazirgi tańda 3 gektar aýmaqta zaýyt ǵımaratynyń metall konstrýktsııalaryn montajdaý jumystary júrgizilip jatyr.
Sýmen qamtamasyz etý úshin magıstraldyq qubyr tartylǵan. Germanııada óndirilgen zamanaýı tehnologııalyq jabdyqtar satyp alynyp, jetkizildi.
Jańa óndiris ornyn iske qosý 2026 jyldyń tamyz aıyna josparlanyp otyr.
Bul óńirdiń eksporttyq áleýetin arttyrýǵa, aýyl sharýashylyǵy taýar óndirýshilerin sapaly jem-shóppen qamtamasyz etýge jáne eldiń agroónerkásip kesheniniń damýyna tyń serpin berýge jol ashady.
Budan buryn Jetisý oblysynda 500 myń tonna ónim shyǵaratyn qant zaýyty jańǵyrtylyp jatqanyn jazǵanbyz.
